Киир

Киир

Бэҕэһээ, тохсунньу 15 күнүгэр, Уус Алдан Бэрт Ууһуттан төрүттээх, Учууталлар учууталлара, РСФСР норуотун үөрэҕириитин туйгуна, Слепцовтар учууталлар аҕа уустарын төрүттээччитэ, Мүрү нэһилиэгин бочуоттаах олохтооҕо Матрена Семёновна Гоголева 101 сааһын томтойо туолла!

Бу хаартыскаҕа ытык киһибит үөрэнээччилэрэ, билигин бэйэлэрэ 80-с хаардарын санныларыгар түһэрбит эбэ, хос эбэ, эһэ дьон, кинини эҕэрдэлии кэлэ сылдьан түспүт түгэннэрин көрөҕүт! Бу буоллаҕа – үрдүк дьол!

Матрена Семёновна, 1942 сыллаахха, Дьокуускайдааҕы учууталлары үөрэтэн таһаарар училищены бүтэрбит. Оччолорго баара эрэ 20-лээх кыысчаан, Хоро алын сүһүөх оскуолатыгар үлэҕэ киирэр. Ол кэнниттэн биир сыл Тандаҕа учууталлыыр. Дьэ, 1944 сылтан саҕалаан 1986 сылга диэри, Мүрү 1-кы нүөмэрдээх оскуолатыгар, ол аата, бүтүн 42 сыл устата – биир үөрэх кыһатыгар таһаарыылаахтык үлэлиир!
Ити курдук, кини уопсайа 44 сыл устата улуус үгүс көлүөнэ ыччатын билиигэ-көрүүгэ сирдээн, олох киэҥ аартыгар үктэннэрбит сүҥкэн кылааттаах!

1966 сылтан – Мүрү оскуолатын партийнай тэрилтэтин сэкиритээрэ, 1967-68 сс. – ССКП уобаластааҕы кэмитиэтин пленумун чилиэнэ, 1964-1967 с. – оройуоннааҕы үөрэх тэрилтэтин идэлээх сойуустарын казначейа.
Матрена Семеновна сааһырдым диэн тохтообокко, олох хойукка диэри олоҕун анаабыт тапталлаах оскуолатын түмэлигэр үлэлээбитин билэр дьон кэпсииллэр.

Дойду үрдүнэн быйыл – Учуутал уонна настаабынньык сыла. Бу кэмҥэ Сахабыт сиригэр 100 ордугуна 1 сааһын томтойо туолбут ытык-мааны учуутал биһиги аттыбытыгар баара – история биир бэлиэ түгэнэ, дьолбут буоллаҕа!

Ытыктабыллаах Матрена Семёновнаны “Кыым” ааҕааччыларын аатыттан истиҥник эҕэрдэлиибит, чэгиэн туругу, этэҥҥэ буолууну баҕарабыт!


Татьяна Захарова-ЛОҺУУРА.

Тарҕат:

Санааҕын суруй

Бүтэһик сонуннар