Олунньу 28 күнүгэр СССР норуодунай худуоһунньуга Афанасий Николаевич Осипов төрөөбүтэ 95 сыла буолар.
Бу бэлиэ күнүнэн Дьокуускай куорат Губинскай уокуругар искибиэр тутарга быһаардылар. Манна Национальнай ойуулуур-дьүһүннүүр түмэл уонна Горнай улууһа төһүү буолуохтара. Худуоһунньук төрөөбүт күнүн диэки мэҥэ тааһын эскиһин оҥорууга күрэс биллэриэхтэрэ. Ол туһунан үлэлиир хамыыһыйа мунньаҕар култуура миниистирэ Юрий Куприянов иһитиннэрдэ.
«Быйылгы тэрээһиннэр чулуу худуоһунньук Афанасий Осипов төрөөбүтэ 100 сылыгар үчүгэй олук ууруохтара», - диэн кини бэлиэтээтэ. Ол курдук, А.Н. Осипов аатынан хартыына галереятын өрөмүөннүөхтэрэ, сыл устата оҕолорго өрөспүүбүлүкэтээҕи анимационнай киинэ күрэһин, күһүн «А.Н.Осипов – сир киһитэ» билим-быраактыка кэмпириэнсийэтин, худуоһунньуктарга «Бор көмүс киистэтэ» күрэс-пленэр уонна да атын тэрээһиннэри ыытыахтара, «Саха» НКИХ ханаалыгар А.Н. Осипов туһунан биэриилэри бэлэмнээн таһаарыахтара.
Сонун төрдө: CӨ Култуура уонна духуобунай сайдыы министиэристибэтин пресс-киинэ
