Ааспыт сылга холоотоххо, “Саха сүөһүтэ” генофондалаах судаарыстыбаннай тэрилтэҕэ саха ынаҕын ахсаана 204-нэн улааппыт. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Ол иһигэр ыанар ынах ахсаана 47-нэн эбиллибит. Уопсайа тэрилтэ 9 хаһаайыстыбатыгар 1171 саха боруодата баар, ол иһигэр 345 ыанар ынах. 2022 сылга 329 ньирэй төрөөбүт, ити ол иннинээҕи сыллааҕар 85-нэн элбэх.
2022 сыллаахха Нам Таастааҕар саҥа сайылык, саха боруодатын генофондун репродукциялыыр билим стационара тутуллубута, Аммаҕа “Күллэги” отделениетыгар 100 сүөһүгэ анаммыт хотону тутууга буор куппуттара. Былырыын тэрилтэ Москубаҕа ыытыллыбыт “Көмүс күһүн” быыстапка-дьаарбаҥкаҕа племенной уонна табаарынай производствоҕа үрдүк көрдөрүүлэрин иһин бастыҥнар кэккэлэригэр киирбитэ – икки кыһыл көмүс мэтээли ылбыта. Быйыл Аммаҕа “Күллэги” отделениетыгар 100 сүөһүгэ саҥа хотон уонна Горнайга “Кылыс” отделениетыгар 180 сүөһүгэ этнокомплекс тутуллуоҕа. Быйыл тэрилтэ саха сүөһүтүн – 1345, ол иһигэр ыанньыгын 442-гэ диэри улаатыннарар соруктаах.
Санатар буоллахха, “Саха сүөһүтэ” ГКП 2020 сыллаахха саха боруодатын ууһатар, харыстыыр соруктаах 2020 сыллаахха тэриллибитэ.
Ил Дархан дьаһалынан кыра дохуоттаах дьиэ кэргэннэри өйүүргэ туһуламмыт эбии мэхэньиисим быһыытынан киирбит социальнай хантыраагы олоххо киллэрэргэ быйыл 1 млрд солк. итэҕэһэ суох үп көрүллүөҕэ.
Ити үбүнэн кыра дохуоттаах гражданнар урбааны (ИП) сайыннаралларыгар, кэтэх хаһаайыстыбаларын туталларыгар, үлэ көрдөнөллөрүгэр, уустук кэмнэри туоруулларыгар аадырыстаах көмө быһыытынан туһаныахтара.
Бэйэ кэр.
