Бэҕэһээ Москуба уобалаһын Химки куоратын 10 №-дээх лиссиэйигэр бэһис кылаас үөрэнээччитэ, 12 саастаах М. бииргэ үөрэнэр кыыһын С. куукуна быһаҕынан үлтү сэймэктээн өлөрө сатаата. Быраастар эмсэҕэлээбит кыыс этигэр 100 тахса быһах суолун аахтылар. Итинтэн 20 дириҥник, 26 сирэйигэр түбэспит. Хаана баран өлөр туруктаах оҕону үс чаас устата эпэрээссийэлээтилэр.
Саамай ынырыга, М. сэймэктээбит кыыһын оскуола туалетыгар хаалларан баран, туох да буолбатаҕын курдук кылааска киирбит уонна “Мин кинини өлөрдүм” диэбит. Кинини тута атын сиргэ илдьибиттэр уонна төрөппүттэрин ыҥырбыттар. Быһылааҥҥа икки холуобунай дьыала – киһини өлөрөргө холонуу уонна үөрэх тэрилтэтин салалтатын өттүттэн дьалаҕай быһыы иһин - тэрилиннэ. М. уйулҕатын туругун эспиэрдэр үөрэтэ сылдьаллар.
Кыргыттар туохтан мөккүспүттэрэ аныаха диэри чуолкайа суох. Сабаҕалааһын быһыытынан, Genshin Impact диэн көмпүүтэр оонньуута төрүөт буолуон сөп. Кэнники биллибитинэн, М.-ҕа кыыһы өлөрөр санаа түүн киирбит. Ол туһунан кини биир дьүөгэтигэр суруйбут. Онуоха дьүөгэтэ бу суругу улахаҥҥа уурбатах. Салгыы М. өлөрүөхтээх кыыһын туалекка ыҥыран ылбыт уонна түҥнэри хайыһарга көрдөспүт. Онтон, кэннинэн турдаҕына, моойго аспыт. Сиэртибэ тохтото сатыыр көрдөһүүлэрин истибэккэ, быһаҕынан анньыалыы турбут, туалекка үрдүкү кылаас үөрэнээччитэ киирбитигэр биирдэ тохтообут.
Быһылаан тахсаатын кытары, М. ийэтэ С. аҕатыгар "Бырастыы гыныҥ" диэн суруйбут. Кыргыттар атааннаһыыларын туһунан бииргэ үөрэнэр оҕолоро билбэтэх курдуктар. Интэриниэккэ М. саҥата суох бүтэҥи майгылаах туйгун үөрэнээччи, С. төттөрүтүн сытыы-хотуу, сайаҕас майгылаах курдук ойуулууллар. Ол эрээри М. аҕата оҕотун атын оҕолортон туох да уратыта суох, кэпсэтинньэҥ, успуордунан дьарыктанар, оҕобуттан манныгы кэтэспэтэҕим диэн кэпсээбит.
Билигин уопсастыба толкуйданыах тустаах. Уон икки саастаах оҕоҕо киһини өлөрөр хара санаа туохтан киирдэ? Бу быһылааҥҥа гаджет буруйдаах дуу, төрөппүт дуу? Тугу оҥорон, тугу уларытан, оҕолорбутун хара санаалартан уонна хара санаалаахтартан быыһыыбыт? Бастакы хардыы курдук, Дьокутаат Останина Genshin Impact оонньууну боборго этии киллэрдэ.
Хаартыска: https://msk1.ru
Киин таһаарыылар матырыйаалларынан бэйэ кэр.
