Быйыл балаҕан ыйыгар Нам улууһугар 65 куойкалаах кырдьаҕастар уонна инбэлииттэр интэринээт-дьиэлэрэ арыллыаҕа. Күн бүгүн тутуу 52% бэлэм. Эбийиэги “Демография” национальнай бырайыак иитинэн туталлар.
“СӨ судаарыстыбаннай сакааһын сулууспата” ГКУ сүрүннүүр инженерэ Дмитрий Еремеев кэпсээбитинэн, билигин саҥа интэринээт-дьиэ бастакы иккис этээстэрин эркиннэрин сыбыыллар, уотун тардаллар, кырыыһатын оҥоро сылдьаллар. Олунньу 5-6 күннэригэр дьиэ тас бүрүөһүнүн матырыйааллара тиэллэн кэлиэхтээхтэр. Маны таһынан, лиип, вентиляция тэриллэрин атыылаһаллар.
Ордук болҕомто саҥа интэринээт-дьиэ олохтоохторун сынньалаҥнарыгар ууруллуоҕа. Интэринээт тэлгэһэтигэр чэбдигирдэр физкултууранан дьарыктанарга былаһаакка, хаамарга анал ыллык баар буолуохтара. Билигин саҥа эбийиэги тутууга 39 киһи үлэлии сылдьар.
Бу иннинэ Айсен Николаев саҥа интэринээт үлэҕэ киирдэҕинэ, Нам улууһугар эбии үлэ миэстэтэ тахсарын этэн турар. Саҥа интэринээт аттыгар оройуоннааҕы балыыһа өссө биир саҥа эбийиэгэ тутуллуоҕа.
Бэйэ кэр.
