Ульяновскай куоракка устуоруйаҕа аан маҥнай художественнай гимнастикаҕа кулууптар ортолоругар Арассыыйаҕа бастыыр иһин күрэхтэһии буола турар. Бу күрэхтэһиигэ Саха сириттэн (Дьокуускай куораттан) үс кулууп кытта сылдьар: “Либерти”, “Бриллианты Туймады” уонна “Сардаана” иитиллээччилэрэ.
Ульяновскайга 2010-2014 сс. төрөөбүт кыргыттар бардылар.Манна Арассыыйа 33 эрэгийиэниттэн барыта 1000-тан тахса спортсмен күрэхтэһэр. Тэрийээччи – аан дойду уонна Европа хас да төгүллээх чөмпүйүөнэ, биллэр гимнастка Ольга Капранова салайааччылаах Кулууптар бүтүн Арассыыйатааҕы ассоциациялара. Бу күрэхтэһии художественнай гимнастиканан дьарыктанар оҕолор салгыы сайдалларыгар, бэйэ-бэйэлэрин кытта билсэллэригэр, күрэхтэһэргэ уопутуралларыгар эбии кыаҕы биэриэҕэ.
Саха сириттэн сылдьар 20 гимнастка биирдиилээн турнирга уонна икки бөлөҕүнэн күрэхтэһиигэ хамаандаҕа кыттыаҕа. Даҕатан эттэххэ, маҥнайгы күннэргэ күрэхтэһии түмүгүнэн, Далаана Антонова успуорт маастарыгар хандьыдаат нормативын аан бастаан толордо. Ульяновскайга хамаандалары кулууп салайааччылара Александра Бронских, Светлана Павлова, Евгения Павлова уонна СӨ Художественнай гимнастикаҕа федерациятын бэрэсидьиэнэ Людмила Валерьевна Николаева арыаллаан илдьэ сылдьаллар.
Ульяновскайга аан дойдуга аатырар, элбэх таһымнаах чөмпүйүөнү иитэн таһаарбыт Арассыыйа үтүөлээх тириэньэрэ Татьяна Грибкова спортивнай оскуолата үлэлиир. Бу оскуола “Татьяна-арена” диэн ааттаах уораҕайыгар билигин СӨ художественнай гимнастикаҕа сүүмэрдэммит хамаандата үөрэнэр, дьарыктанар. Күрэхтэһиигэ бара сылдьан Людмила Николаева хамаанда кыттыылаахтарын кытта көрүстэ, үөрэнэр, олорор, дьарыктанар усулуобуйаларын көрдө-иһиттэ.
Людмила Валерьевна Татьяна Николаевна Грибкованы кытта салгыы үлэ, дьарык кэскилин торумнастылар, чугастааҕы соруктарын дьүүллэстилэр. Кыргыттар манна олорон эрэ таһымнарын үрдэтэллэр, сыыйа успуорт маастарын нормативын толоруохтаахтар. Бу барыта кинилэр салгыы кыахтарын сайыннаралларыгар, кэлин Санкт-Петербурдааҕы Лесгафт аатынан успуорт уонна физкультура национальнай университетыгар Саха сириттэн тус сыаллаах миэстэҕэ кииирэн, тириэньэр дипломун ылалларыгар бастакы төһүү, тирэх буолуоҕа.
Людмила Николаева: “Биһиги билигин улахан суолталаах түһүмэҕи ааһан эрэбит – сүүмэрдэммит хамаандабытын бэлэмниибит уонна спортсменнарбыт таһымнарын үрдэтэбит. Уонна көмөлөөн кыргыттарбытын иитэн-такайан таһаарар Саха сирин уонна Ульяновскайдааҕы бииргэ үлэлэһэр партнердарбытын, уһуйааччыларбытын бары өттүнэн хааччыйа, өйүү сатыыбыт», – диэтэ.
Бэйэ кэр.
