Бүгүн Арассыыйа бэрэсидьиэнэ Владимир Путин анал байыаннай дьайыы саҕаламмыта биир сылынан Федеральнай мунньахха уонна дойду олохтоохторугар туһаайыы оҥордо. Кини сүрүн болҕомтотун судаарыстыба састаабыгар киирбит сирдэри көмүскээһиҥҥэ уонна чөлгө түһэриигэ, анал байыаннай дьайыы кыттыылаахтарын өйөөһүҥҥэ, тутулуга суох экэниэмикэни сайыннарыыга, олох таһымын үрдэтиигэ уонна норуот сомоҕолоһуутугар уурда.
Бэрэсидьиэн туһаайыыта анал байыаннай дьайыы төрүөтүн быһаарыыттан саҕаланна. Салгыы кыттыылаахтар Украина атаҕастабылыгар олорор биир дойдулаахтарбытын уонна Арассыыйа бас билиитигэр киирбит сирдэрбитин көмүскүү сылдьан олохторун толук уурбут байыастарбытын саҥата суох туран кэриэстээтилэр. Тэрээһин Владимир Путин бар дьоҥҥо махталынан уонна Арассыыйа гимнынан түмүктэннэ. Кини биир сыл иһигэр Арассыыйаҕа дьиҥнээх патриотизм уонна тутулуга суох экэниэмикэ баар буолла, анал байыаннай дьайыы тоҕо уонна туох туһугар бара турарын дьон өйдөөтө диэн аһаҕастык эттэ.
Дьокуускайга быһа биэриини Өрөспүүбүлүкэтээҕи уопсастыбаннай киин дьиэтигэр көрдөрдүлэр. Биһиги анал байыаннай дьайыы кыттыылааҕа, “Боотур” этэрээт хамандыыра Александр Колесовтан бэрэсидьиэн туһаайыытыттан туох санааҕа кэлбитин ыйыттыбыт.
- Владимир Владимирович Украинаҕа анал байыаннай эпэрээссийэ тоҕо саҕаламмытын өссө төгүл быһааран биэрбитэ олус сөптөөх. Билигин даҕаны бу күһэлэҥ миэрэ буоларын өйдөөбөт дьон бааллар. Оттон биһиги арҕааҥҥы дойдулар Украинаҕа фашизмы, Бандера ыччаттарын иитэн таһааран соруйан Арассыыйаны утары туруорбуттарын үчүгэйдик билэбит. Аҕыс сыл тухары Донецкай, Луганскай өрөспүүбүлүкэлэр олохтоохторун дэлби тоҕута ытыалаан, өлөртөөн, геноцид оҥоро, нуучча тылын, култууратын суох гына сатаатылар. Ол кырдьык. Арҕааҥҥы дойдулар Арассыыйаҕа дьиҥ сыһыаннарын көрдөрдүлэр, бииртэн биир санкциялары киллэрэннэр, экэниэмикэбитин сууллара сатаатылар. Ону баара биир сыл иһигэр Арассыыйа экэниэмикэтэ төттөрүтүн кыаҕырда. Тус бэйэм, бэтэрээн буоларым быһыытынан, бэрэсидьиэн анал байыаннай дьайыы кыттыылаахтарыгар, олохторун толук уурбут дьоруойдарбытыгар уонна кинилэр дьиэ кэргэттэригэр социальнай-мэдиссиинискэй көмөнү оҥорууну өссө күүһүрдэр туһунан этиитин үөрэ иһиттим. Ол туһугар Бүтүн Арассыыйатааҕы Пуонда тэриллэр буолла. Бу Пуонда кыаҕа улахан буолуо. Бэрэсидьиэн өссө биир суолталаах этиитинэн кини «Стратегическай кимэн киирии сэбилэниитин аҕыйатыы туһунан» үһүс дуогабарга кыттыыны тохтотон эрэрин туһунан этиитэ буолла. Ол эбэтэр, “АХШ ядернай сэрии сэбин бастакынан тургутар түгэнигэр Арассыыйа олорон биэриэ суоҕа” диэн быһаччы сэрэттэ. Маны сөптөөх сэрэтии дии саныыбын. Арассыыйа сэбилэниилээх күүстэрэ сайда тураллар уонна дойдуну көмүскүүргэ бэлэмнэр, - диэн Александр байыаннайдыы быһаччы хоруйдаата.
Ону сэргэ бэрэсидьиэн анал байыаннай дьайыы кыттыылаахтарыгар уонна кинилэр дьиэ кэргэттэригэр көмөлөһүү туһунан чопчу этиилэри оҥордо. Ол курдук, хас биирдии дьиэ кэргэн көрөр-истэр куратордаах буолуохтаах, көмө күүттэриитэ суох судургутук уонна тута оҥоһуллуохтаах. Маны сэргэ Владимир Владимирович анал байыаннай дьайыылар Арассыыйа экэниэмикэтигэр, дьон олоҕун таһымыгар охсуо суохтаахтарын тоһоҕолоон эттэ. Арассыыйа састаабыгар киирэр ДНР, ЛНР, Запорожье уонна Херсон уобаластарын олохтоохторо дойдуга олохтоммут социальнай миэрэлэри толору туһаныахтаахтар. Олортон биирдэстэрэ 2007 сылтан бэттэх төрөөбүт оҕолорго Ийэ хапытаалын биэрии буолар.
Бэйэ кэр.
