Бүлүү куоракка олунньу 25 күнүгэр саҥа балыыһа комплексын бастакы уочаратын – уопсай блогу уонна хирургия отделениетын үлэҕэ киллэрдилэр. Улуус олохтоохторун СӨ Ил Дархана Айсен Николаев уонна РФ Госдууматын Доруобуйа харыстабылыгар кэмитиэтин бэрэссэдээтэлин бастакы солбуйааччыта Федот Тумусов эҕэрдэлээтилэр.
Айсен Сергеевич бэлиэтээбитинэн, нэһилиэнньэ өссө 90-с сылларга Бүлүүтээҕи киин балыыһаҕа саҥа дьиэ тутуутун туруорсубут эбит. 2014 с. бырабыыталыстыбыта бэрэссэдээтэлэ Галина Данчикова үтүөтүнэн сыбаайа түһэрэн, тутууну саҕалаабыттар эрээри, кэккэ төрүөтүнэн тиһэҕэр тиэрдибэтэхтэр. 2018 с. «Доруобуйа харыстабыла» национальнай бырайыак олоххо киирэн, балыыһаны тутуу салҕаммыт. Айсен Сергеевич балыыһа иккис уочаратын тутуу сотору саҕаланан 2025 с. бүтүөхтээҕин туһунан иһитиннэрдэ. Кини балыыһа кэллэктиибигэр саҥа суһал көмө массыынатын ыларга сэртипикээт туттарда.
Улуус баһылыга Сергей Винокуров, олохтоохтор ааттарыттан өрөспүүбүлүкэ салалтатыгар уонна тутааччыларга махтанан туран, балыыһа тутуутун отут сылы быһа кэтэспиттэрин, онон бу улуус устуоруйатыгар улахан суолталаах күн буоларын тоһоҕолоото. Доруобуйа харыстабылын бэтэрээнэ, Саха АССР, РФ үтүөлээх бырааһа, Бүлүү улууһун бочуоттаах гражданина, тыа сиригэр сүрэххэ аан бастакы эпэрээссийэни оҥорбут хирург Никита Матвеев 1989 с. балыыһаҕа саҥа дьиэ тутарга этии киллэрбитин ахтан ааста уонна Ил Дархаҥҥа махтанна.
Саҥа балыыһа комплекса уустук эпэрээссийэлэри оҥорорго сөптөөх бары усулуобуйанан хааччыллыаҕа. Маны сэргэ балыыһаны үрдүк таһымнаах быраастарынан уонна орто үөрэхтээх персоналынан толору хааччыйыыга үлэ ыытыллыаҕа.
Сонун төрдө: CӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА
