Уопсастыбаннас Василий Даниловка «Арассыыйа дьоруойа» ааты иҥэриигэ күүскэ турунна

Аҕыйах хонуктааҕыта Уус Алдан улууһун Бороҕон сэлиэнньэтигэр СӨ Бырабыыталыстыбатын отчуотун кэмигэр олохтоохтор СВО кыргыһыытыгар бэйэтин хорсуннук көрдөрбүт, үгүс бойобуой сорудаҕы туйгуннук толорбут, эдэр байыастары быыһаары олоҕун толук уурбут Гвардия ыстаарсай сержана, разведчик, хамандыыр Василий Васильевич Даниловка «Арассыыйа дьоруойа» үрдүк ааты иҥэрэри туруорсубуттара. Улуус баһылыга Федотов Алексей Васильевич нэһилиэнньэ санаатын өйүүрүн биллэрэн,  илии баттааһына саҕаламмыта.

Бу күннэргэ илии баттааһыныгар байыаннай дьайыылар бэтэрээннэрэ, идэлээх сойуустар, энэргиэтикэ, суол үлэһиттэрэ, устудьуоннар, урбаанньыттар, учууталлар, спортсменнар, уопсастыбанньыктар кыттыстылар. Көҕүлүүр бөлөххө анал байыаннай дьайыыларга кытта сылдьар биир дойдулаахтарбыт илии баттааһыырга бэлэмнэрин туһунан биллэрбиттэр.  

Байыаннайдар Василий Даниловы үчүгэйдик билэллэр. Кини саҥа сулууспалыы тиийбит биир дойдулаахтарыгар олус кыһамньылаахтык уонна харыстабыллаахтык сыһыаннаһарын, мэлдьи сүбэлии-амалыы сылдьарын, уопута суохтары инники кирбиигэ ыыппакка, уустук сорудахтарга бэйэтэ уопуттаах байыастары кытта барарын туһунан кэпсииллэр.  

Василий ДНР Павловка сэлиэнньэтин аннынааҕы бүтэһик кыргыһыытын кэмигэр бөлөх хамандыыра этэ. Бу бөлөххө Саха сирин  уолаттара бааллара. Василий өлөр уоттан Мэҥэ Хаҥалас улууһуттан төрүттээх Николай Семеновы таһаарбыта. Быыһаммыт уол кыргыһыы кэнниттэн сибээскэ тахсан хамандыырдарын үтүөтүнэн тыыннаах хаалбыттарын иһитиннэрбитэ. Хомойуох иһин, хамандыыр бэйэтэ өстөөх буулдьатыгар таптаран биһиги кэккэбититтэн букатыннаахтык туораабыта.

Саха сирин олохтоохторо Василий Данилов бойобуой суола уонна хорсун быһыыта Арассыыйа дьоруойун аатыгар толору эппиэттиир диэн бигэ санаалаахпыт.  

Уопсастыбаннас илии баттыыр пууннара:

1. “Туймаада” ТРК, 1 этээс, «Унция» маҕаһыын

2. “Айсберг” ТЦ, 2 этээс, “Камелек”, “FORWARD” маҕаһыыннар

3. “Камелёк” маҕаһыын, Орджоникидзе 56

4. “Сахапечать” (Бэчээт дьиэтэ), 1 этээс, 125 каб.

5. “Вавилон” ТЦ, 2 этээс, 204 павильон

Бэйэ кэр.