«Муус устар» бэстибээл түмүк тэрээһинэ Дьокуускайга кулун тутар 24 и 25 күннэригэр «Триумф» успуорт комплексыгар ыытыллыа. Манна үгэс буолбут лазер, муусука уонна хаар шоулара, бэстибээл кыайыылаахтарын хаамыыта буолуохтара.
12 хайысханан былаһааккалар, быһа биэрии уонна контены оҥоруу устуудьуйалара, сүрүн сцена уонна арт-эбийиэктэр үлэлиэхтэрэ. Маны таһынан, Сайсары күөлгэ халлаан моҕойдорун көтүтүүнү, фудкорт уонна эдэр толорооччулар кэнсиэртэрин тэрийиэхтэрэ.
Бэстибээл ыалдьыттарынан уонна эспиэрдэринэн успуорт гимнастикатыгар олимпийскай чөмпүйүөн Никита Нагорнай, «Россия 1» тэлэбиидэнньэ ханаалын ыытааччыта Денис Полунчуков, «ВКонтакте» социальнай ситим амбассадора Алекса Доминика, киинэни үөрэтээччи Алексей Апостолов, «Просвещение» кинигэ кыһатын эспиэрэ Алексей Ермолин, варганист Ильдар Гамадиев уонна да атыттар буолуохтара.
Бу сылга «Муус устар» Арассыыйаҕа Үөрэтээччи уонна уһуйааччы сылын, Саха сиригэр Үлэ сылын иитинэн ыытыллар. Бэстибээл түмүгүнэн өрөспүүбүлүкэ бастыҥ ыччаттаах оройуонун эбэтэр куорат уокуругун талыахтара. Бүтүн Арассыыйатааҕы оҕо уонна ыччат «Движение первых» хамсааныһа оҕо медиафорумун кыайыылааҕын быһаарыаҕа.
Сонун төрдө: Бэстибээл пресс-киинэ
