Өрөспүүбүлүкэҕэ Үлэ сылынан, Чурапчы улууһугар Ытыктабыл сылынан, Чурапчы нэһилиэгэ 375 үбүлүөйдээх сылынан сибээстээн, 2023 сыл олунньу 28 күнүгэр "Утум" сайдар кииҥҥэ улуустааҕы "Аман өс" күрэҕэ дьону-сэргэни түмэ тарта. Күрэх икки хайысханан барда: "Төрөөбүт дойдуга таптал" уонна "Үлэ киһитэ үйэлэргэ кэпсэнэр".
Барыта 11 киһи кэлэн, сайаҕас сахабыт тылынан санааларын сайа этэн үллэстэн, үлэ киһитин уруйдаан, төрөөбүт дойдубутун айхаллаан, олус үрдүк таһымнаах күрэх ыытыллан, туруорбут сыалын толору ситтэ. Бииртэн биир хомоҕой тыллаах киһи тахсан, киһи эрэ умсугуйа истиэх гына кэпсээн-ипсээн, Ытык Чыыбыстааны ытыгылыырын, ийэ тыл сүмэтин этигэр-хааныгар иҥэриммитин чахчы итэҕэтэн, олус элбэх саҥаттан-саҥа билиини бары иҥэринэн, санаалыын сырдаатыбыт, дуоһуйдубут. Ытык дьоммутун сурукка тиһэн, сырдык ааттарын үйэтиттибит. Бастыҥ үлэлээх ытык дьоммутунан киэн туттуу өрөгөйө барыбыт сүрэҕин абылаата. Төрөөбүт дойдубутугар тапталбыт күүһүрэн, барыбытын өссө үрдүккэ, сырдыкка, кэрэҕэ ыҥыра угуйда.
Дьүүллүүр сүбэҕэ нэһилиэк социальнай боппуруостарын специалиһа Матвеева М.П., киин библиотека ааҕааччыны кытта үлэлиир отделын сэбиэдиссэйэ Кузьмина М.Н., А.А.Саввин аатынан Чурапчытааҕы история уонна этнография музейын директора Толстоухов Ю.С., "Үөрүү" оҕону эбии үөрэхтээһин киинин үлэһитэ Пермякова Л.А. уонна "Арчы дьиэтин" киинин салайааччыта Петрова А.Н. үлэлээтилэр.
"Кылаан кыайыылаах" үрдүк ааты Кытаанахтан Монгуш Л.Н. ылары ситистэ. Кини төрөөбүт Кытаанаҕын туһунан түҥ былыргыттан саҕалаан, Улуу Кудаҥсаны сиһилии сырдатан, дьон-сэргэ болҕомтотун ылыан ылла. Бастакы миэстэни ытыктанар туруу-үлэһит, салайааччы Илья Павлович Листиков туһунан ахтыытынан Хатылыттан Атласова У.Н., иккис миэстэни "Маһы, тимири ыллатар удьуор уус дьон" диэн дакылаатынан Чурапчыттан Сергеева Н.Е., үһүс миэстэни Болтоҥоттон Лебедева М.Д. "Олорбут олоҕо - Болтоҥо туһугар" диэн Чурапчы улууһун бочуоттаах олохтооҕо Николай Яковлевич Местников туһунан дакылаатынан ыллылар.
Дьүүллүүр сүбэ анал бирииһин Чурапчыттан Ермолаева Е.Н. аҕатын Ермолаев Алексей Петрович туһунан ахтыытынан, Попова Н.Н. "Федот Федотович Захаров Боотурускай улуус уустарын үйэтиппит үлэтэ" диэн дакылаатынан, Мугудайтан Гоголева С.С. "Туруу үлэһит ССРС Государственнай бириэмийэтин лауреата, сылгыһыт Толстоухов М.С." дакылаатынан ыллылар.
Сылын аайы ыытыллар төрөөбүт тыл ыйыгар аналлаах "Аман өс" күрэх инникитин даҕаны өссө элбэх киһини түмэ тартын. Төрөөбүт ийэ тылбытынан ыраастык, холкутук саҥаран, санаабытын сайа этэн-тыынан, саханы саха дэтэн сандаарыаҕыҥ! Саха омук буоларбытынан киэн туттуоҕуҥ!
Наталья Сергеева-Аана Кыыһа
