Өрөспүүбүлүкэтээҕи “Бастыҥ социальнай педагог” күрэх муниципальнай түһүмэҕэр Дьокуускай М.И. Кершенгольц аатынан 9 №-дээх орто оскуолатын социальнай педагога Галина Горохова кыайыылаах буолла.
Эспиэрдэр хамыыһыйалара маҥнай кыттааччылар үлэлэлэрин кэтэхтэн көрөн 7 бастыҥ үлэлээх педагогу талбыта. Онтон кулун тутар 2 күнүгэр 31 №-дээх орто оскуолаҕа ыытыллыбыт күрэх түмүк тэрээһинигэр кыайыылааҕы быһаарбыттара. Манна кыттааччылар бэйэлэрин билиһиннэрбиттэрэ, төрөппүттэри кытта үлэлиир бырагыраамаларын уонна бырайыактарын көмүскээбиттэрэ, «Мин профессионалбын» диэн маастар-кылаас ыыппыттара уонна эспиэрдэр ыйытыыларыгар хоруйдаабыттара. Ол түмүгүнэн, саамай элбэх баалы ылбыт Галина Горохова бастаата. Кини өрөспүүбүлүкэтээҕи күрэххэ Дьокуускай куорат аатыттан кыттыаҕа. Атыттар араас номинацияларга тигистилэр.
Тэрээһиҥҥэ кыттыбыт социальнай педагогтары Үөрэх управлениетын салайааччытын солбуйааччыта Егор Охлопков эҕэрдэлээтэ уонна 31 №-дээх оскуола дириэктэригэр Алина Бубякинаҕа, социальнай педагогтар түмсүүлэригэр, эспиэрдэргэ уонна успуонсардарга махтанна.
Сонун төрдө: Дьокуускай к. уокуруктааҕы дьаһалтатын пресс-сулууспата
