Кулун тутар 6 күнүгэр Горнай улууһун Бэс Күөлүгэр "Түмсүү – сайдыы төрдө" диэн социальнай бырайыак суруйуутугар форсайт ыытылынна.
Форсайтка нэһилиэк тэрилтэлэриттэн, уопсастыбаннай түмсүүлэриттэн, түөлбэлэриттэн уопсайа 5 хамаанда кыттыыны ылла.
Форсайт бастакы чааһыгар "Идея+Бырайыак= Грант" диэн семинар-практикум ыытылынна. Семинары Атамай нэһилиэгин " Ситим" общественнай тэрилтэтин салайааччыта Татьяна Павлова ыытта.
Кыттааччылар социальнай бырайыак тутулун, грант сайаапкатын суруйуутун, сыаналааһын киритиэрийдэрин кытта билистилэр, тутатына Бэрэсидьиэн гранын пуондатын порталыгар страница арынан сайаапкаларын оҥоһуннулар.
Форсайт иккис чааһыгар хамаандалар хоһунан тарҕаһан, күн устата бэйэлэрин баҕа санааларын бырайыакка тиһэн порталга сайаапка быһыытынан оҥорон уктулар.
Бу күн эспиэрдэринэн нэһилиэк бастыҥ уопсастыбанньыктара, хас да граны ылбыт бырайыактар ааптардара Айсен Павлов, Дария Сидорова, Татьяна Павлова, Акулина Филиппова үлэлээтилэр.
Форсайт түмүктүүр чааһыгар 5 хамаанда бэйэлэрин бырайыактарын эспиэрдэр иннилэригэр билиһиннэрдилэр, тутатына сүбэ ылан көннөрүү үлэтин ыыттылар. Эспиэрдэр бырайыактар салгыы ханнык грант күрэҕэр кыттыахтарын сөбүн сүбэлээтилэр, тэҥҥэ үлэлэһэр былааннарын эттилэр. Ити курдук бүгүн нэһилиэк сайдыытын кэрэһэлиир 5 бырайыак күн сирин көрдө:
- Эдэр учууталлар хамаандаларын "Районный фестиваль для молодых педагогов" бырайыага;
- Оҕо саадын уһуйааччыларын хамаандатын "Образовательный Терренкур"бырайыага.
- "Үрдэл" түөлбэ хамаандатын "Я будущий учитель" бырайыага.
- "Кэскил" түөлбэ хамаандатын "Аллея матери и ребенка "Дьол уйата" (Гнездо счастья) бырайыага.
- Олохтоох дьаһалта хамаандатын "Пожарная дружина. Атамай хоһууннара" бырайыага.
Бары кыттааччыларга туоһу суругу, эспиэрдэргэ махтал суругу нэһилиэк баһылыга Айсен Павлов туттарда.
Түмүккэ нэһилиэкпит бастыҥ уопсастыбанньыктарыгар, дойдуларын туһугар ис сүрэхтэриттэн кыһаллар, долгуйар саамай көхтөөх дьоммутугар дириҥ махталбытын тиэрдэбит.
Валентина Яковлева
