Кулун тутар 9 күнүгэр “мобильнай луохтуурдар” биригээдэлэрэ Эдьигээн Муома уонна Дьааҥы улуустарыгар көттүлэр. Оттон кулун тутар 11 күнүгэр Аллайыахаҕа сылдьыахтара.
Быраастар бу улуустар бары 36 нэһилиэнньэлээх пуунугар үлэлиэхтэрэ. Үгэс курдук, биригээдэлэргэ, терапевтартан уонна педиатрдартан ураты, атын исписэлиистэр: кардиолог, невролог, уролог, травматолог, эндокринолог, акушер-гинеколог, ЛОР, УЗИ бырааһа бааллар», – диэн доруобуйа харыстабылын миниистирэ Лена Афанасьева иһитиннэрдэ. Кинилэр дьону көрөллөрүн таһынан, уопсай уонна онкомаркерга, папиллома вируһугар, гепатиттарга ИФА, щитовиднай былчархай гормоннарыгар анаалыстары ылыахтара, УЗИ, ЭКГ аппараттарыгар түһэриэхтэрэ.
Санатар буоллахха, олунньуга «мобильнай луохтуурдар» Абый, Аллараа Халыма, Орто Халыма уонна Усуйаана улуустарыгар үлэлээбиттэрэ. Кинилэр 5 тыһ. кэриҥэ улахан киһини уонна оҕону көрбүттэрэ. Олортон 524 киһини Дьокуускайга сытан эрэ көрдөрүнүүгэ уонна эмтээһиҥҥэ ыыппыттара. Өссө 1254 киһини диспансернай кэтэбилгэ ылбыттара.
“Мобильнай” луохтуурдар муус устар ый бүтүөр диэри Арктика бары улуустарын олохтоохторун көрөн бүтэриэхтэрэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
