Киир

Киир

Дьокуускайга СССР успуордун үтүөлээх маастара, Арассыыйа үтүөлээх тириэньэрэ, олимпийскай чөмпүйүөн Роман Дмитриев кэриэһигэр Норуоттар икки ардыларынааҕы көҥүл тустууга турнир саҕаланна. Манна 13 дойдуттан 2003-2005 сс. төрүөх 260 тахса спортсмен кыттар. 

Көбүөргэ Азербайджан, Армения, Беларусь өрөспүүбүлүкэтин, Греция, Индия, Иран, Казахстан, Кыргызстан, Монголия, Узбекистан, Таджикистан, Молдова, ону сэргэ Арассыыйа 27 регионун бөҕөстөрө тахсыахтара. 

Турнир 10 сыллаах устуоруйатыгар турнирга аан маҥнайгытын  Арассыыйа, Азербайджан, Узбекистан, Кыргызстан, Монголия, Беларусь өрөспүүбүлүкэтин уонна Греция 83 юниор кыргыттара кытталлар. Дойду сборнайын кыргыттарга аҕа тириэньэрэ Анна Карташова бу күрэхтэһии инникитин кыргыттары Арассыыйа сборнайыгар сүүмэрдиир соруктаах ыытыллыан сөп диэн бэлиэтээтэ. 

Ону сэргэ Арассыыйа спортивнай тустууга федерациятын көҥүл тустууга отделын начальнига Петр Юмшанов Роман Дмитриев мемориала аан бастакытын федеральнай бүддьүөттэн үбүлэнэн ыытылларын эттэ.

Турнир 26 судьуйатыттан 16 - Арассыыйа регионуттан уонна 10 - Саха сириттэн буолаллар. Күрэхтэһии сүрүн судьуйата - аан дойду таһымнаах судьуйа Анатолий Ковалев.

Турнир кулун тутар 10 күнүттэн 12 күнүгэр диэри «Триумф» успуорт киинигэр барар. Күрэхтэһиилэри WrestRusRu-YouTube уонна «Триумф» ютуб-ханаалларынан быһа көрдөрөллөр.  

Сонун төрдө: СӨ Бырабыыталыстыбатын уонна Ил Дарханын пресс-сулууспата

Хаартыска: Денис Попов