СӨ Ил Дархана Айсен Николаев ыйааҕынан, 2023-2025 сыллар А.Е. Кулаковскай-Өксөкүлээх Өлөксөй биэс сылынан биллэриллибиттэрэ. Саха литературатын төрүттээччи, фольклорист, этнограф, сырдатааччы Алексей Елисеевич Кулаковскай-Өксөкүлээх Өлөксөй төрөөбүт күнүгэр Сахабыт сирин үрдүнэн “Өксөкүлээх сардаҥата” диэн аахсыйа ыытыллыаҕа.
Былырыын кулун тутар 16 күнүгэр СӨ Бэрэсидьиэнин оскуолаларын ситимэ уонна Николаев Киинин көҕүлээһиннэринэн “Өксөкүлээх сардаҥата” диэн аахсыйа олохтоммута. Бу аахсыйаҕа өрөспүүбүлүкэбит киин улуустарыттан, Өксөкүлээх Өлөксөй үлэлээн ааспыт хотугу улуустарыттан үөрэх тэрилтэлэрэ, култуура кииннэрэ, бибилэтиэкэлэр кыттыыны ылбыттара.
Быйылгы бэлиэ күн чэрчитинэн, Алексей Кулаковскай духуобунай нэһилиэстибэтин нөҥүө Сахабыт сирин, бүтүн дойдубут сайдыытын тобулар суолу ырытар тэрээһиннэр ыытыллыахтара.
Сонун төрдө: Николаев Киинэ
