Дьокуускайдааҕы Үөрэх управлениета иһитиннэрбитинэн, 2023-2024 үөрэх дьылыгар бастакы кылааска барар оҕолордоох төрөппүттэртэн сайабылыанньалары ылыы https://www.gosuslugi.ru/ судаарыстыбаннай өҥө порталын нөҥүө муус устар 1 күнүгэр саҕаланар. Быйыл төрөппүттэргэ сайабылыанньаны эрдэттэн бэлэмниир кыах бэрилиннэ. Ол курдук, «Госуслуги» порталга толорор форма кулун тутар 20 күнүттэн арыллыа. Эрдэттэн суруллубут сайабылыанньаны муус устар 1 күнүгэр ыытар судургу буолуо.
Оҕолору бастакы кылааска ылыы уопсай алын сүһүөх бырагырааматынан үлэлиир 51 оскуолаҕа ыытыллыа. Анал коррекционнай тэрилтэлэргэ оҕолору психолог-медик-педагог хамыыһыйатын түмүгэр олоҕуран ылаллар. Судаарыстыбаннай оскуолалары таһынан, киин куоракка биэс чааһынай оскуола бастакы кылааска ыларын биллэрэбит: 1) ИП Карамзина Т.И. «Гран» алын сүһүөх оскуолата; ИП Бурнашев А.А., "САХАТ" оскуола; Гуманитарнай лиссиэй, "Илиҥҥи-Сибиирдээҕи лиссиэй"; «Точка развития» чааһынай оскуола.
Маны таһынан, оҕолору бастакы кылааска С.Ф. Гоголев аатынан 1 №-дээх Дьокуускайдааҕы педагогическай колледжка уонна 4 коррекционнай интэринээт-оскуолаларга ылаллар.
Олорор дьиэҕит хайа оскуолаҕа түбэһэрин Үөрэх управлениетын эбэтэр оскуолаҕыт сайтыгар киирэн көрүөххүтүн сөп.
Сонун төрдө: Дьокуускайдааҕы Үөрэх управлениета
