Саҥа сыл икки ыйын устатыгар Дьокуускайга кафеларга, бардарга, рестораннарга, кулууптарга уонна итилэр тастарыгар буруйу оҥоруу, онтон сиэттэрэн холуобунай дьыала элбээбит. Ол туһунан баһылык Евгений Григорьев салайыытынан үлэлиир Биэдэмистибэ икки ардынааҕы быраабы кэһиини сэрэтэр хамыыһыйа мунньаҕар кэпсэттилэр. Маны сэргэ, уопсастыбаннай бэрээдэги көрүүгэ ДНД ыытар үлэтин көрдүлэр.
Киин куорат полициятын уопсастыбаннай бэрээдэги көрүүгэ начаалынньыга Николай Тастыгин бу сыл саҕаланыаҕыттан Дьокуускай куорат түүҥҥү кулууптарыгар киһи доруобуйатын эчэтии, илдьи кырбааһын, халааһын уонна уоруу элбээтэ диэн иһитиннэрдэ. Ол курдук, «02» операторын пультугар икки ый иһигэр түүҥҥү кулууптартан 22 үҥсүү киирбит. Ол төрүөтүнэн персоналы кытта бурайсыы, көрүлүү кэлбит дьон икки ардыгар айдаарсыы, охсуһуу, эчэтии уонна сыаналаах малы алдьатыы, сүтэрии буолбут. Ордук элбэх үҥсүү «Айкон», «Мохито», «Новый Пекин» кулууптартан киирбит.
Маны таһынан, Николай Тастыгин арыгылаан баран уопсастыбаннай сирдэргэ уонна уулуссаларга күнүс 14 чаастан түүн 22 чааска диэри буруйу оҥоруу элбээбитин бэлиэтээтэ. Онон, кини арыгы атыылыыр маҕаһыын үлэлиир кэмин өссө кылгатарга уонна дружинниктар үлэлэрин төһө таһаарыылааҕыттан көрөн төлөбүрдэрин үрдэтэргэ этии киллэрдэ.
Сонун төрдө: Дьокуускай к. уокуруктааҕы дьаһалтатын пресс-сулууспата
