Дьокуускай куорат уокуруктааҕы дьаһалтатын иһинэн үлэлиир Административнай хамыыһыйа массыына чааһын атыылыыр «Регион-14» хампаанньаны эппиэтинэскэ тардыбытын уонна 8 тыһ. солкуобайга ыстарааптаабытын киин куорат суута сөптөөҕүнэн аахта.
Ол курдук, тохсунньу 16 күнүгэр Административнай хамыыһыйа бу хампаанньа маҕаһыына эргэрбит көлүөһэлэр тобохторун хомуйбакка ыһан кэбиспитин туһунан үҥсүүнэн үлэлии тиийбит. Бэрэбиэркэ кэмигэр, бу кэһиини таһынан, хампаанньа икки маҕаһыына “СӨ Тылларын туһунан” сокуону кэһэрэ биллибит. Ол эбэтэр, маҕаһыын тас суруга икки тылынан суруллуохтааҕын биир эрэ тылынан суруллан турар эбит. Онон, тохсунньу 26 күнүгэр хамыыһыйа хампаанньаны, Сокуону икки төгүл кэспитин иһин, 8 тыһ. солк. ыстарааптыырга быһаарбыт.
Административнай хамыыһыйа бэрэссэдээтэлин эбээһинэһин толорооччу Алдар Базаров иһитиннэрбитинэн, «Регион-14» хампаанньа ыстараабы кытта сөбүлэспэтэх. Онон, дьыала Дьокуускай куорат суутугар көрүллүбүт. Ол түмүгэр, кулун тутар 10 күнүгэр Административнай хамыыһыйа бу хампаанньаны СӨ КоАП 13.4 ыстатыйатынан эппиэтинэскэ сөпкө тардыбыта уонна 8 тыһ. солк. ыстараапка сөпкө түһэрбитэ дакаастаммыт.
Манна даҕатан, “СӨ Тылларын туһунан” сокуон 4-с уонна 5-с ыстатыйалара өрөспүүбүлүкэҕэ икки судаарыстыбаннай тыл: нуучча тыла уонна саха тыла баарын, оттон Сокуон 35-с ыстатыйата хайа баҕарар тэрилтэ тас суруга, ол иһигэр үлэлиир кэмэ, икки судаарыстыбаннай тылынан суруллан ыйаныахтааҕын тоһоҕолуубут.
Административнай хамыыһыйа, “СӨ Тылларын туһунан” сокуону тутуһууга анаан-минээн рейдэлэри ыыппатар даҕаны, тэрилтэлэргэ атын боппуруостарынан сылдьан маннык кэһиилэри булан, эппиэтинэскэ тардар, сэрэтии биэрэр эбэтэр ыстарааптыыр боломуочуйалаах.
Бэйэ кэр.
