Дьокуускайга II Регионнар икки ардыларынааҕы идэ сатабылын матчевай чөмпүйэнээтэ саҕаланна. Манна Хотугу Осетия, Алания уонна Саха сирин сүүмэрдэммит хамаандалара күрэхтэһиэхтэрэ.
Тэрээһин 2021 сылтан регионнар икки ардыларыгар түһэрсиллибит үлэлэһии сөбүлэҥин чэрчитинэн ыытыллар «От А до Я» үөрэхтээһин бырайыагын биир түһүмэҕэ буолар. Соруга – педагогтарга уонна устудьуоннарга уопут атастаһар кыаҕы биэрии уонна рабочай идэлэр суолталарын үрдэтии. Чөмпүйэнээккэ 20 кыттааччы күрэхтэһиэ. Эспиэрдэр 9 сатабылга бастыҥ эдэр профессионалы талыахтара.
Бэҕэһээ ыалдьыттар дэлэгээссийэлэрэ – Хотугу Кавказ Аграрнай-технологическай колледжын, Хотугу Осетия Педагогическай, Торгово-экономическай уонна Мэдиссиинэ колледжтарын устудьуоннара Саха сиригэр көтөн кэллилэр.
Бүгүн каадырдары бэлэмнээһиҥҥэ үлэлэһии тула пресс-кэмпириэнсийэ буолла. Манна Хотугу Кавказтааҕы үөрэх кыһаларын, Астанатааҕы Уопсастыбаннай ас-үөл уонна өҥө колледжын, Нерюнгритээҕи мэдиссиинэ колледжын, Дьокуускайдааҕы Ю.А. Готовцев аатынан Өҥө технологическай колледжын, Идэлээх үөрэхтээһини сайыннарыы институт спикердэрэ кытыннылар.
Сонун төрдө: Идэлэниигэ эрдэттэн бэлэмниир киин пресс-сулууспата
