Киир

Киир

Быйыл биллиилээх бэлитиичэскэй-судаарыстыбаннай диэйэтэл, экэниэмикэ билимин хандьыдаата, Саха АССР төрүттэспит чулуу уолаттарбытыттан биир бастыҥнара, САССР бастакы совнаркомун бэрэссэдээтэлэ Исидор Барахов төрөөбүтэ 125 сааһын туолар.

Исидор Никифорович саха норуотугар уһулуччу үтүөлээх салайааччы буолар. Ол курдук, гражданскай сэрии кэмигэр үрүҥ хамандыырдарын угаайыларыгар киирэн, арсыын табаар, кутар чэй туһугар сылдьыбыт ханнык даҕаны өстөөх санаалаах буолбатах саха борустуой дьонугар амнистия оҥорторон, элбэх онно кыттыспыт дьону өлөр өлүүттэн быһаабыта, эйэлээх олоххо төнүннэрбитэ. Исидор Барахов Широких-Полянскайы, Иван Строды тылыгар киллэрэн көмөлөһүннэрэн, урут Саха сирин салайан олорбут Лебедевы, Агеевы, Козловы тутан хаайталаабатахтара буоллар, бу амнистия кыайан оҥоһуллубакка, элбэх саха дьоно суорума суолламмыт буолуо этилэр.

Лебедев, Агеев, Козлов Киин кэмитиэккэ сахалары барыларын суох гыннахха өрө туруу тохтуур диэн ыыппыт телеграммаларыттан сылыктаатахха, САССР совнаркомун бэрэсэдээтэлинэн үлэлии олорон Барахов И. Н. Обком сэкэрэтээрэ Пестун Е. Г., Дүпсүн улууһугар ыал олоҕун-дьаһаҕын үөрэтэн онно олоҕуран, өрөспүүбүлүкэ ол кэмнээҕи бүддьүөтүн таҥарыгар туһаммыт бастакы салайааччы буоларын дьон-сэргэ билэр.

Өрөспүүбүлүкэ Ил Дархана Айсен Сергеевич Николаев 2023 сылы Үлэ сылынан биллэриитэ саха норуотугар ураты улахан үтүөлээх Исидор Никифорович Барахов төрөөбүтэ 125 сылыгар саха сирин дьоно үлэҕэ- хамнаска өрө көтөҕүүлээхтик норуот хаһаайыстыбатын бары салаатыгар ылсан үлэлиэхтэрэ, айыахтара-тутуохтара, ситиһиилэр баар буолуохтара диэн эрэл санааттан биллэрбит буолуон сөп.

Быйыл Исидор Никифорович Барахов аата бүтүн Саха сирин үрдүнэн доргуччу ааттаныахтаах, кини оҥорбут үтүөлэрин саха саҥалаах барыта истиэхтээх, билиэхтээх, сыаналыахтаах. Өрөспүүбүлүкэ бары дьоно-сэргэтэ туруорсан, кини мэҥэ тааһа турар сиригэр баар Поярков уулуссатын уларытан Исидор Барахов ааты иҥэриллэрин ситиһэн, историческай чахчы оннун буларыгар кылааттарын ууруохтаахтар диэн эрэлбит улахан.

Үөһээ Бүлүү улууһун Балаҕаннаах нэһилиэгин
баһылыга Степан Дмитриев.