Бэҕэһээ, муус устар 2 күнүгэр, киэһэ Санкт-Петербург куорат Университетскай набережнай уулуссатыгар турар “Street Food Bar №1” кафеҕа дэлби тэптэриилээх теракт буолла. “Кибер Z фронт” дискуссионнай кулууп көрсүһүүтүгэр дьоруой быһыытынан ыҥырыллыбыт байыаннай кэрэспэдьиэн Владлен Татарскай тута быһынна, отут киһи, ол иһигэр 14 саастаах кыыс оҕо, эчэйэн балыыһаҕа киирдилэр. Бу кафены урукку хаһаайын, ЧВК "Вагнер" салайааччыта Евгений Пригожин “Кибер Z фронт” хамсааһыҥҥа биэрбит.
Дэлби тэптэриигэ “Настя” диэн аатынан тэрээһиҥҥэ кэлбит кыыс уорбаланар. Көстүбүт хаартыскаларынан уонна видеоларынан бу Дарья Трепова диэн урут сэриини утарар миитиннэргэ тутулла сылдьыбыт 24 саастаах, СПбГУ мэдиссиинискэй университетын бүтэрбит кыыс буоларын быһаарбыттар. Кинини бөлүүн тутан хаайбыттар.
“Настя” махталын бэлиэтигэр Владлен Татарскайга кини бүүһүн бэлэхтээбит. Ол иһигэр 200 гр тротилга тэҥнэһэр күүстээх эстэр эттик угуллубут. Военкор, бэлэҕин остуолга уураатын кытта, дэлби тэбии буолбут. Кыыс терагы соҕотоҕун тэрийбэтэҕэ сабаҕаланар. Онон, билигин кыттыгастаах дьону көрдүү сылдьаллар.
Владлен Татарскай туһунан: Дьиҥнээх аата - Максим Фомин. Донбасстан төрүттээх, Макеевкаҕа олорбут. 2014 сылтан ополчение кэккэтигэр сылдьыбыт. 2020 сылтан Москубаҕа көһөн айымньы суруйар буолбут. Бэйэтин туһунан хас да кинигэлээх. Анал байыаннай дьайыы саҕаланыаҕыттан Донецкайга көһөн, «Восток» батальоҥҥа киирбит. Ол туһунан телеграм-ханаал арынан көхтөөхтүк ыыта сылдьыбыт. Онно бүтэһигин 16.00 ВСУ кимэн киириитин суруйбут. Муус устар 25 күнүгэр 41 сааһын туолуохтааҕа. Былырыын күһүн ыал буолбут эбит.
Хаартыска: https://ria.ru
