Дьокуускайдааҕы психоневрологическай диспансер олохтоох исписэлиистэргэ анаан, уопуттаах байыаннай психолог көмөтүнэн, байыастары чөлгө түһэрии ньымаларыгар биир ыйдаах үөрэх тэрийдэ. Билигин онно тэйиччиттэн отуттан тахса исписэлиис үөрэнэ сылдьар.
Маннык санаа ЯРПНД сүрүн бырааһа Туяра Решетниковаҕа Ростов-на-Дону куорат госпиталыгар командировкаҕа сырыттаҕына үөскээбитэ. Онно кини Чечня сэриитигэр, Сириятааҕы байыаннай эпэрээссийэҕэ үлэлээбит улахан уопуттаах байыаннай психолог Татьяна Фаттахованы кытта билсибитэ уонна кини үлэлиир ньымаларын биһирээн, бэйэтин үлэһиттэригэр тарҕатарга этии киллэрбитэ.
- Татьяна Ивановна биһиги этиибитигэр сөбүлэспититтэн олус үөрэбит. Исписэлиистэрбит үгүстэрэ - байыаннай дьайыыларга сылдьан улахан охсууну ылбыт дьону кытта хаһан да үлэлээбэтэх дьон. Онон, кинилэргэ байыаннай психолог билиитэ уонна баай уопута олус туһалаах буолуо дии саныыбын, - диэтэ Туяра Семеновна.
Бэйэ кэр.
