Бүгүн «Кыым» телеграм-ханаалыгар тахсыбыт видео элбэх киһини аймаата. Манна ыттар, дьон хаһаатыгар киирэн, кулуннанан эрэр биэни тардыбыттара көстөр, хаһаайын кыһыыта-абата иһиллэр.
Быһылаан Үөһээ Бүлүү Кэнтигэр буолбута биллэн, СӨ ветеринариятын департаменын старшай иниспиэктэрэ Иннокентий Ильин суһаллык быһаарса тиийдэ.
Кини иһитиннэрбитинэн, ыттар биэҕэ саба түһүүлэрэ муус устар 7 күнүгэр сарсыарда буолбут. Билигин нэһилиэк дьаһалтатын уонна полиция үлэһиттэрэ сиэмэх кыыллар хаһаайыттарын көрдүү сылдьаллар. Иниспиэктэр нэһилиэнньэлээх пууҥҥа ыттары босхо ыытыы иһин 2 боротокуолу толордо.
Ветеринария департамена ыттары нэһилиэнньэлээх пууҥҥа босхо ыытыы бобуулааҕын уонна кутталлааҕын туһунан санатар. Бу ирдэбили кэһии иһин 1000-5000 солк. кээмэйдээх ыстараап көрүллэр.
Сонун төрдө: СӨ ветеринариятын департаменын пресс-киинэ
Сэҥээриилэр