Муус устар 15 күнүттэн ыам ыйын 31 күнүгэр диэри кэлэр сылга тутуллуохтаах уопсастыбаннай сирдэри талыыга Бүтүн Арассыыйатааҕы рейтинниир онлайн-куоластааһын барарын туһунан Ил Дархан иһинэн үлэлиир Архитектура уонна куораты тутуу управлениета иһитиннэрдэ. Куоластааһын «Олорор дьиэ уонна куорат эйгэтэ» национальнай бырайыак чэрчитинэн ыытыллар.
Саха сирэ быйылгы куоластааһыҥҥа 21 нэһилиэнньэлээх пуунтан 50 бырайыагы кытыннарыаҕа. Бу Дьокуускай, Алдан, Томмот, Бүлүү, Ленскэй, Мииринэй, Удачнай уонна Нерюнгри куораттар, Аллараа Кураанах, Сангаар, Айхал, Аллараа Бэстээх, Чульман, Мохсоҕоллоох уонна Жатай бөһүөлэктэр, Амма, Чапчылҕан, Улахан Аан, Павловскай, Нам, Даппарай сэлиэнньэлэр.
Бырайыактары муус устар 15 күнүттэн Бүтүн Арассыыйатааҕы 14.gorodsreda.ru онлайн-платформаҕа киирэн көрүөххүтүн уонна сөбүлээбит түгэҥҥитигэр куоластыаххытын сөп. Манна 14 сааһын туолбут хайа баҕарар киһи кыттар кыахтаах. Куоластааччы олорор сиригэр сыһыаннаах биир сири талан куоластыыра көҥүллэнэр. Онон, уопсастыбаннай сир ханна тутуллара куолас ахсааныттан быһаччы тутулуктаах.
Онон, управление үлэһиттэрэ Саха сирин олохтоохторун көхтөөхтүк кыттарга ыҥыраллар. Куоластааһыҥҥа кыайбыт нэһилиэнньэлээх пууннар уопсастыбаннай сири тутууга субсидия ылыахтара. Кэнники сылларга көхтөөхтүк кыттан уопсастыбаннай сирдэри тутууну Дьокуускай, Ньурба, Өлүөхүмэ куораттар, Сунтаар, Ытык Күөл, Амма уонна Майа сэлиэнньэлэр ситиспиттэрэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
