“Аҕа күрэҕэ” аҕалар уонна уолаттар күрэхтэрэ дьиэ кэргэн бигэ тирэхтээх, чөл куттаах-сүрдээх буоларын, онно ийэни сэргэ аҕа оруола улахан суолталааҕын уопсастыбаҕа тириэрдэр, – диэн СӨ норуодунай дьокутаата, “Саханефтегазсбыт” АУо генеральнай дириэктэрэ Виктор Николаевич Лебедев этэр.
“Бэйэм аҕа буолан туран, кыра сааспыттан ыарахан үлэттэн толлубакка, хоту дойду тыйыс усулуобуйатыттан чаҕыйбакка үлэлииргэ-хамсыырга, дьиэ кэргэммэр бигэ тирэх, суон дурда буоларга үөрэппит-такайбыт аҕабын олус истиҥник махтана саныыбын”, – диэн этэр. Виктор Николаевич норуот сөбүлүүр, киэн хабааннаах дьиэ кэргэн күрэҕин – “Аҕа күрэҕин” – нэһилиэктээҕи, оройуоннааҕы уонна өрөспүүбүлүкэтээҕи бары кыттааччыларыгар махтанна. Кинилэр бары Саха сирин дьиэ кэргэнигэр холобур буолалларын санатта. Ааспыт өрөбүллэргэ Таатта Туора Күөлүгэр 23-с төгүлүн ыытыллыбыт “Аҕа күрэҕин” финалистарыгар сыаналаах бириистэри туттара туран, дьиэ кэргэн үтүө үгэстэрин уонна сыаннастарын бөҕөргөтөргө анаммыт бырайыактары мэлдьи сэргээн-кэрэхсээн өйүүрүн эттэ.
Маны сэргэ Виктор Лебедев Ытык Күөл сэлиэнньэтин 15 сыллаах үбүлүөйүн бэлиэтээбит “Сарыал” култуурунай, спортивнай сайдыы киинин бастыҥ үлэһиттэрин эҕэрдэлээтэ, махтал суруктары уонна өйдөбүнньүк бэлэхтэри туттарда. “Сарыал” киин Ытык Күөл уонна Таатта улууһун бүттүүнүн нэһилиэнньэтигэр култуурунай, спортивнай уонна духуобунай олоҕор уһулуччу суолталааҕын этэн туран үлэтин-хамнаһын үрдүктүк сыаналаата.
Норуот дьокутаата сырыытын иккис күнүгэр Томпо оройуонун уонна СӨ Бочуоттаах олохтооҕо, СӨ норуотун хаһаайыстыбатын бочуоттаах үлэһитэ Егор Дмитриевич Кычкин 90 сааһыгар анаммыт муус аннынан балыктааһын оройуоннааҕы күрэҕин кыайыылаахтарын чиэстэстэстэ. Итиэннэ Томпо оройуонун маастардарын бирииһигэр ыытыллыбыт мас тардыһыытын өрөспүүбүлүкэтээҕи турнирын аһыллыытыгар кытынна. Тэрээһин тэрийээччилэрэ, биир дойдулаахтара дьокутааттарыгар, Виктор Николаевич Лебедевкэ, икки оройуон көҕүлээһиннэриттэн туора турбатын, мэлдьи көхтөөхтүк кыттарын, күүс-көмө буоларын иһин истиҥник махтаннылар.
Яна БАЙГОЖАЕВА.
