«Кыым» хаһыат хас да нүөмэригэр Холуобунай кодекс УК 132 ыстатыйатын 14 сааһын туола илик оҕоҕо сексуальнай дьайыылары оҥоруу диэн пуунунан буруйданан уһун болдьоххо хаайыыга барбыт дьон аймахтара уонна албакааттара тэрийбит төгүрүк остуолларын матырыйаалынан «Ыарахан» ыстатыйа өссө хас киһи олоҕун алдьатар?» диэн үс ыстатыйаны таһаарбыппыт.
Онно кыттааччыллар Николай Сивцев, Максим Местников, Руслан Иванов уонна Михаил Мамруков хара балыырга түбэһэн хаайыллыбыттарын, өһү-сааһы ситиһэр хара санаа сиэртибэлэрэ буолбуттарын, кинилэри буруйдааһын аҥаардас үҥсээччи көрдөрүүтүгэр олоҕуран тэриллибитин, силиэдэбэтэллэр дьыаланы талбыттарынан эргитэллэрин кэпсээбиттэрэ. Саха сиригэр бу ыстатыйанан саамай элбэх киһи Сунтаарга, Бүлүүгэ уонна Дьокуускайга сууттаммыта биллибитэ. Ол тухары буруйа суоҕа дакаастанан биир даҕаны киһи суут саалатыттан босхолоно илигэ.
Арай бүгүн эрэ өтөрүнэн истибэтэх соһуччу сонуммут тиийэн кэллэ. Ол курдук, "Стоп беззаконию" көҕүлүүр бөлөх пресс-киинэ иһитиннэрбитинэн, муус устар 18 күнүгэр Холуобунай кодекс 132-с ыстатыйатынан буруйданан 13 сылга хаайыыга уураахтаммыт Бүлүү куорат олохтооҕун И.Н. Иванову Саха Өрөспүүбүлүкэтин Үрдүкү суута кинини буруйа суоҕунан ааҕан, Бүлүү суутун уурааҕын көтүрэн, саалаттан босхолоото.
Манна даҕатан эттэххэ, Бүлүү следкома уонна прокуратурата кыттыһан тэрийбит, Бүлүү суута көрбүт дьыалаларынан билигин уһун болдьохтоох хаайыыга Николай Сивцев - 16 сылга, Александр Васильев - 12,5 сылга ууруллан, хаайыыга олороллор. Бу дьон эмиэ хара балыыр сиэртибэлэрэ буолбуттарын, туох да буруйа суохтарын аймахтара уонна албакааттара дакаастыахпыт диэн бигэ санаалаахтар.
Бэйэ кэр.
