В.Н. Оконешников аатынан Павловскай орто оскуолатын 10-с кылааһын үөрэнээччилэрэ сааскы уһун өрөбүллэригэр Санкт-Петербург куоракка идэни билиһиннэрэр турга баран кэллилэр. Кинилэр бу айаҥҥа баралларыгар госпиталга эмтэнэ сытар байыастарбытын умнубатылар, бүтүн оскуоланан көмө хомуйан илтилэр.
Ол курдук, дириэктэр Валерий Петров, патриотическай иитиини сүрүннээччи Анастасия Капитонова салайыытынан, оскуола бары үлэһиттэрэ уонна үөрэнээччилэрэ «Дойдум эмтээх аһа» диэн аахсыйанан отон, эриллибит эт хомуйан, «Символ добра» диэн аахсыйанан харысхал оҥорон, «Саллаакка сурук» диэн аахсыйанан сурук суруйан көхтөөхтүк кыттыбыттар. Саха сирин буойуннарын ийэлэрин регионнааҕы кэмитиэтин нөҥүө Саха сирин бэрэстэбиитэлистибэтин кытта сибээстэспиттэр. Онон, Санкт-Петербург аэропордугар көрсө киирбит бэрэстэбиитэлгэ илдьибит көмөлөрүн, бэлэхтэрин, Бурденко госпиталыгар анаан оҕолор уруһуйдаабыт икки хартыыналарын барытын туттаран, үөрбүттэр-көппүттэр.
Оҕолору кылаас салайааччыта Айталина Флегонтова, тэрийээччи-педагог Алина Китаева, гигиенист Татьяна Плотникова арыаллаан сылдьыбыттар. Айталина Авксентьевна этэринэн, оҕолор бу үтүө дьыалаҕа ис сүрэхтэриттэн баҕаран туран кыттыбыттар.
Бэйэ кэр.
