Биһиги чэпчэтиилээх сурутуу кэмигэр, муус устар 10-20 күннэригэр, сыл иккис аҥаарыгар «Кыым» хаһыакка босхо сурутууну социальнай ситимнэрбитигэр оонньоттубут. Ол курдук, Кыым.ру телеграм-ханаалбытыгар «Кыым» хаһыаты тоҕо уонна кимиэхэ сурутуоххун баҕараҕын?» диэн ыйытыыга бастыҥ хоруйу суруйан, сыл иккис аҥаарыгар сурутууну Алена Гаврильева диэн ааҕааччыбыт ийэтигэр, Мэҥэ-Хаҥалас улууһун Хочо сэлиэнньэтин олохтооҕо, педагогическай үлэ бэтэрээнэ М.Н. Гаврильеваҕа бэлэх уунар буолла. Кини суругун эһиги болҕомтоҕутугар таһаарабыт:
«Мин "Кыым" хаһыаты ийэбэр Григорьева Мария Николаевнаҕа сурутуохпун баҕарабын. Ийэм - педагогическай үлэ бэтэрээнэ, сэтинньигэ 80 сааһын туолбута. Билигин даҕаны уопсастыбаннай олоххо көхтөөхтүк кыттар, иистэнньэҥнэр түмсүүлэригэр сылдьар, иистэнэр, сиэлинэн, кылынан, туоһунан араас оҥоһуктары оҥорор.
Ийэм хаһыаты, саҥа бэчээттэнэн тахсыбыт кинигэлэри көтүппэккэ ааҕар. Кыра эрдэхпиттэн аахпыт айымньыларын миэхэ кэпсээччи, ол айымньылар ис хоһооннорун харахпар киинэ курдук көрөөччүбүн. Урут хаһыаты истиэнэҕэ тоһоҕоҕо иилэн иһэллэр этэ. Үгүс ыалга оннук баар буолааччы. Ол да иһин 5 саастаахпар аан бастаан аахпыт тылым «Кыым» буолар. Хаһыат аатын, төбөбүн кынньаччы туттан баран, "Кыым" диэн аахпыппар дьонум оҕобут ааҕар буолбут дуу диэн соһуйбуттарын өйдүүбүн.
Ийэм билигин устудьуон сиэннэрин кытта куоракка олорор. Күндү киһибэр Педагог уонна уһуйааччы сылынан сэргэх сонуннаах, элбэх кэпсээннээх куруук кэтэһэр "Кыым" хаһыатыгар сурутууну бэлэх уунуохпун баҕарабын».
Биһиги ытыктабыллаах Мария Николаевнаны Педагог уонна уһуйааччы сылынан истиҥник эҕэрдэлиибит, биһиги хаһыаппытын сөбүлээн ааҕарын иһин махтанабыт уонна чэгиэн-чэбдик туругу, дьоллоох олоҕу, уһун үйэни баҕарабыт!
"Кыым" хаһыат эрэдээксийэтэ
