Аан дойду сайдыылаах омуктарыгар чэй иһиитин сиэрэ-туома духуобунай култуура биир муҥутуур чыпчаалын быһыытынан сыаналанар. Хас биирдии омук чэй иһэр ураты үтүө үгэстээх.
Быйыл Саха Өрөспүүбүлүкэтин норуоттарын ассамблеята (сал. А.Г.Подголов) “Евразия омуктарын чэй иһэр култууралара” диэн бырайыагы саҕалаабыта. Улахан кинигэ буолан тахсыахтаах саҕалааһын салайааччыта, сахалыы чэй иһии култууратын тарҕатааччы, эспиэр, “ Якутский Чайный Дом” (сал. Т.А.Тымырова) бырайыагынан РФ Бэрэсидьиэнин Гранын кыайыылааҕа, “Чай кучу в культуре народа саха” кинигэ ааптара Кучу Туйаара анал чинчийэр соруктаах Евразия дойдуларынан үлэлии сылдьар.
Казань куоракка татаар чэйин историятын отуттан тахса сыл чинчийбит историк учуонай Р.А.Бушкову, түүр омуктар биһиктэринэн биллэр Хайалаах Алтаай чэйдиир үгэстэрин тарҕатааччы, паломническай туризмы саҕалааччы С.Ш. Катынованы кытта алтыһыы үтүө түмүктэрдээх буолла. Алтай суруйааччыларын түмсүүтүн бэрэссэдээтэлэ, бэйиэт, бахсы Б.Я.Бедюров, Арассыыйаҕа бастакынан “Эрмитаж”чэй кулуубун тэрийбит китаевед, тылбаасчыт Б.Б. Виногродскай, “Бирюзовай чэй” хампаанньа салайааччыта, “Азбука чая” анал үөрэх ааптара С.В. Хорольскай бу киэҥ далааһыннаах кэскиллээх үлэни өйүүллэрин биллэрдилэр. Улан Удэ “Орда” ресторан (Д.А. Дашиев) “Саха киэһэлэрэ” диэн тэрээһинигэр сахалыы чэй иһии сиэрин-туомун ыалдьыттар олус сэҥээрдилэр. Казань, Улан Удэ куоракка үрдүк үөрэх кыһатыгар үөрэнэ сылдьар устудьуоннары кытта кучу чэй тула истиҥ көрсүһүүлэр буоллулар.
Маны таһынан, кинигэ кыһаларыгар, түмэллэргэ үлэ түмүгүнэн кинигэни байытар сонун матырыйаал хомулунна.
"Якутский чайный дом" тэрилтэ пресс-киинэ.
