Уус Алдан улууһун Мүрү орто оскуолатыгар анал байыаннай дьайыы хонуутугар дьоруойдуу охтубут, хорсун разведчик, хамандыыр Василий Данилов кэриэһигэр өрөспүүбүлүкэтээҕи байыаннай-спортивнай күрэхтэһии буолан ааста.
Тэрээһини Василий үөрэммит Мүрү оскуолата уонна улуустааҕы үөрэх управлениета тэрийдилэр. Анал байыаннай эппэрээссийэҕэ бииргэ сылдьыбыт доҕотторо эмиэ өйөөтүлэр. Кинилэр харчынан көмө ыытан анал бириистэри олохтоотулар. Манна буойун чугас дьоно, оҕолоро уонна бойобуой доҕоро Николай Семёнов кытыннылар. Кинини, инники кирбии киирсиитигэр бааһыран сыттаҕына, Василий уот үөһүттэн таһааран быыһаабыта.
Күрэхтэһиигэ Бороҕонтон уонна Уус Алдан нэһилиэктэрин оскуолалара , Чурапчыттан, Мэҥэ-Хаҥаластан хамаандалар күөн көрүстүлэр. Оҕолор строевой бэлэмҥэ, ытыыга, сааны ыһар, хомуйар түһүмэхтэргэ уонна патриотическай ырыаҕа, кадеттар балларын үҥкүүлэригэр күрэхтэстилэр.
Уопсай түмүккэ кыайыылааҕынан Мүрү 1 №-дээх оскуолата ааттанна. Иккис Чурапчы хамаандата, үһүс Мүрү 2 №-дээх оскуолата буоллулар. Тэрийээччилэр Василий Данилов кэриэһигэр байыннай-спортивнай оонньууну сылын аайы ыытар санаалаахтар.
Бэйэ кэр.
