Өссө 2021 сыл кулун тутар уонна алтынньы ыйдарыгар биллиилээх косплеер Айаал Федоров биир санаалаахтарын кытта Чочуур Мырааҥҥа «Звездные войны» киинэттэн мандалорец «Razor Crest» уонна истребитель «X-wing» копияларын туппута.
Косплеер айар үлэтин сэҥээрээччилэр Айаал өссө тугу оҥорон сөхтөрөрүн кэтэспиттэрэ даҕаны, талааннаах уолу Москубаҕа «В далекой-далекой Галактике...» диэн косплей-быыстапкаҕа үлэлэтэ ыҥырбыттара. Бу сөҕүмэр быыстапка бүгүн, муус устар 28 күнүгэр, Араассыыйа киин куоратын ВДНХ уораҕайыгар аһылынна.
Тэрийээччилэр этэллэринэн, маннык, галактикалар икки ардыларыгар айаны оҥорон көрдөрөр быыстапка ханна да суох. Ол курдук, көрдөрүүгэ 200 тахса экспонат турбут. Олор истэригэр атын планеталар расаларын аниматроннай бэрэстэбиитэллэрэ, куйаарга көтөр тиэхиньикэ, куйаар дойдуларын инсталляциялара уонна киинэҕэ кэтиллибит көстүүмнэр галереялара бааллар.
Быыстапка ВДНХ 21-с павильонун икки этээһин ылар уонна киинэҕэ көстүбүт сценаларынан 16 зонаҕа арахсар. «Звездные войны» киинэ сагатын алыптаах эйгэтигэр босхо бэриллэр аудиогиды эбэтэр экскурсоводы кытта айанныахха сөп. Талааннаах биир дойдулаахпыт үлэлэспит «В далекой-далекой Галактике...» быыстапкатын сааһыттан тутулуга суох ким баҕарар сөҕө-махтайа көрүөҕэ.
Сонун төрдө: https://yakutia24.ru
