Дьокуускайга биир «наһаа кыһамньылаах » дьахтар уһуйаан тиэргэнигэр педофилы көрбүтүн туһунан элбэх сурутааччылаах «Сахадэй » пабликка суруйбут. Ону баара, аҕыйах мүнүүтэ иһигэр «педофил» буола сыспыт эр киһи тиэргэн уутун хачайдыы кэлбит үлэһит буолан биэрбит.
Үҥсээччи «Муус устар 28 күнүгэр уһуйаан тиэргэнигэр биир эр киһи тэпилииссэни өҥөйө турарын көрбүтүм. Маҥнай үлэһит дии санаабытым. Онтум бэсиэккэҕэ киирэн олорон эрэн арыгылаах иһити хантатан барбыта. Уонна, биллэн турар, оҕолору одуулаабыта! Кини орто саастаах, доҕолоҥнуур. Төрөппүттэр оҕолорун соҕотохтуу биир да мүнүүтэ хаалларбаттарыгар сүбэлиибин. Оҕо былаһааккатыгар эмиэ!» диэн суруйбут уонна ыраахтан түһэрбит хаартыскатын ыыппыт.
Онуоха уһуйаан салалтата бу иһитиннэрии сымыйа буоларын бигэргэппит: «Эр киһи биһиэхэ үлэлиир. Салайааччы ыҥырыытынан хаар уутун оботторууга үлэлии кэлбитэ. Кини арыгы испитин туһунан үҥсээччи бэйэтин оҥорон көрүүтэ. Бу кэмҥэ үлэһиттэр бары баарбыт. Онон, туора киһи киирбитин тута көрүөх этибит», - диэн быһаарбыттар.
Дьэ, киһини итинник баһааҕырдыы хайдах диэлийэн тахсыа биллибэт этэ. Кэнники педофилияҕа буруйдааһын, өһү-сааһы ситиһэр, оҕону, үбү-харчыны, дьиэни-уоту былдьаһар эбэтэр бэйэ буруйун саптынар ньымаҕа кубулуйан, сиэри таһынан элбээбитин бары көрө, истэ сылдьабыт. Үҥсээччилэр, суоҕу да баар гынан түмүк оҥорон, үҥсэ охсоллоро түргэнэ сөхтөрөр. Маннык түгэҥҥэ буруйа суох киһи хаайыыга барыан, бүтүн дьиэ кэргэн олоҕо огдолуйуон толкуйдаан көрөргүтүгэр сүбэлиибит.
Бэйэ кэр.
