Бүгүн Туймаада туонатыгар Нелькантан көһөн кэлбит табалартан бастакы тугут төрөөн күн сирин көрдө! Тыһы табачааны Кындыкан диэн ааттаатылар. Биһиги бастакы тугут тыһы буолбута үчүгэй бэлиэ дии саныыбыт. Мантан антах бөдөҥсүйүү эрэ күүтэр диэн сылыктыахха сөп.
Үтүөкэн сонуну биһиэхэ бырайыак салайааччыта Илан Кындыкан иһитиннэрдэ. Кини Нелькан удьуор табаһыттара Евгения уонна Николай Карамзиннар Эдьигээнтэн төрүттээх Раиса Ильиноваҕа бэлэхтээбит табаларын аҕалыыга, олохсутууга хара маҥнайгыттан көмөлөһөр.
Биһиги Илантан Карамзиннар уонна табалар тустарынан ыйыталастыбыт. Чуолаан, табалар аһылыктарын уонна табаһыттар доруобуйаларын туругун. Илан табалар мэччийэр сирдэригэр лабыкта баар, онон үчүгэйдик аһыыллар диэтэ. Оттон үйэлэрин тухары ыарахан үлэҕэ сылдьыбыт Карамзиннар СӨ Доруобуйа харыстабылын министиэристибэтин көмөтүнэн толору көрдөрүнүүнү ааспыттар, доруобуйаларын быһаартарбыттар.
Билигин учаастакка сүрүн кыһалҕанан күрүөлээһин буолар. Бу үп-харчы тиийбэтиттэн кыаллыбакка турар. Булт кэмэ саҕаламмытынан, бүтэрээри ыксыыллар. Маны таһынан, интэриниэт холбонуохтааҕа эмиэ туохтан эрэ харгыстаммыт. Онон көмөлөһүөн баҕалаахтары билсэргитигэр көрдөһөллөр.
Бэйэ кэр.
