Ыам ыйын 18 күнүгэр Владивосток куоракка «Уһук Илиҥҥи репортер» медиа-оскуола V-с үбүлүөйдээх үөрэҕин тиһэх сиэссийэтэ түмүктэннэ. «Сыыппара суруналыыстыката» хайысхалаах биир сыллаах онлайн уонна күнүскү үөрэҕи Уһук Илин 11 регионуттан барыта 158 бэрэстэбиитэл ааста. Саха сирин медиа-эйгэтиттэн үөрэҕи 25 киһи ситиһиилээхтик бүтэрдэ.
Бүтэрээччилэр дастабырыанньаларын адмирал Г.И. Невельскэй аатынан Муоратааҕы судаарыстыбаннай университет эрчиллэр киинигэр туттардылар. Саха сирин дэлэгээссийэтин Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлин солбуйааччыта Григорий Куранов уонна СӨ Бырабыыталыстыбатын уонна Ил Дарханын дьаһалтатын салайааччыта Георгий Михайлов эҕэрдэлээтилэр.
Аҕыс ыйдаах онлайн уонна күнүскү үөрэҕи ааспыт «Ситим» медиа-бөлөх «Кыым.ру» саайтын уонна социальнай ситимнэрин эрэдээктэрэ Мария Дегтярева кэлэн санаатын үллэһиннэ:
- Бары билэргит курдук, билигин сыыппара эйгэтэ олус түргэнник сайдар. Ону сэргэ, сырдатар-иһитиннэрэр эйгэҕэ саҥа технологиялар, ирдэбиллэр, ньымалар киирэллэр. Онон электроннай таһаарыы үлэһиттэрэ күннэтэ араас уустуктары көрсөбүт, кыһалҕалары туоруубут. Бу «Дальневосточный репортер» диэн медиа-оскуола тоҕоостоох кэмҥэ ыытылынна уонна олус туһалаах буолла. Манна информация ис хоһоонуттан саҕалаан тахсар көрүҥүгэр тиийэ үөрэтэр маастар-кылаастары ыыттылар, анал байыаннай дьайыыны сырдатыы хайдах барыахтааҕын быһаардылар, интерактивнай дьарыктары, уопут атастаһар кэпсэтиилэри ыыттылар. Аҕыс ый устата барбыт онлайн-үөрэҕи таһынан атын региоҥҥа тиийэн үөрэнии киһини олус сайыннарар уонна салгыы өссө таһаарыылаахтык үлэлииргэ кынаттыыр.
Уһук Илиҥҥи федеральнай уокурукка пресс-сулууспа үлэһиттэрин, суруналыыстар уонна блогердар таһымнарын үрдэтэр соруктаах «Уһук Илиҥҥи репортер» медиа-оскуола биэс сыл устата барыта 400 киһини үөрэтэн таһаарда. Манна ИТАР-ТАСС ааҕыныстыба, Социальнай көҕүлээһин пуондатын, «Диалог» кэмиэрчэскэйэ суох уонна да атын тэрилтэ исписэлиистэрэ, байыаннай кэрэспэдьиэннэр, биллиилээх блогердар, психологтар үлэлэстилэр.
Бэйэ кэр.
