Ыам ыйын 23 күнүгэр Кремль Екатерининскай саалатыгар Владимир Путин «Барс-2» доброволецтар батальоннарыгар киирэр «Боотур-1» этэрээт хамандыырыгар Александр Колесовка Арассыыйа Дьоруойун сулуһун - «Кыһыл көмүс сулус» мэдээли туттарда. Санатар буоллахха, Саха сирин «Боотур-1» доброволецтар этэрээттэрэ Ил Дархан дьаһалынан 2022 сыл от ыйын 27 күнүгэр тэриллибитэ.
Бэрэсидьиэн наҕараадалааһыны биир дойдулаахпытыттан саҕалаата: «Бүгүн манна анал байыаннай эпэрээссийэ кыттыылаахтара, дойдубутугар сомоҕолоһон олорор элбэх норуот бэрэстэбиитэлэ кэлэн олорор. Биһиги кинилэр хорсун быһыыларынан киэн туттабыт. Олортон биирдэстэрэ Александр Гаврильевич Колесов бойобуой соругу дьоһуннаахтык толорбутун таһынан, бааһырбыт доҕотторун ытыалааһын үөһүттэн таһаарбыт. Ол иһин кини «Арассыыйа Дьоруойа» үрдүк ааты сүктэ, – диэн кини тоһоҕолоон эттэ.
СӨ Бырабыыталыстыбатын уонна Ил Дарханын пресс-сулууспата иһитиннэрбитинэн, 2022 сыл балаҕан ыйын 22-24 күннэригэр БАРС-2 этэрээт байыастара ДНР сиригэр буолбут кырыктаах кыргыһыыларга кыттыбыттар. Өстөөх кимэн киириитэ күүстээҕин үрдүнэн, биһиги байыастарбыт ону утары охсубуттар. Александр Колесов кимэн киирииттэн күүстээх көмүскээһини тэрийбит уонна буола турар быһыыны-майгыны аармыйа штабыгар биллэрэ турбут. Кини тиэрдибит информациятынан эвакуация сөпкө оҥоһуллубут.
Бэйэ кэр.
