Билигин биһиги кэккэбитигэр суох Владимир Членовы өйдүүр киһи үгүс буолуохтаах. Владимир Михайлович - биллиилээх судаарыстыбаннай уонна бэлитиичэскэй диэйэтэл, “Саха сирин Арктиката” полярниктар ассоциацияларын” төрүттээччи, бэрэсидьиэнэ, Ил Түмэн IV, V, VI ыҥырыылаах мунньаҕын дьокутаата, РФ тырааныспарын бочуоттаах үлэһитэ, бочуоттаах полярник, СӨ Норуот хаһаайыстыбатын үтүөлээх үлэһитэ, Булуҥ улууһун бочуоттаах олохтооҕо, “Хотугу сулус” уордьан кавалера.
Владимир Членов сырдык аатын үйэтитэр сыалтан кини аатынан олохтоммут бириэмийэ сылын аайы туттарыллар буолуоҕа. Бириэмийэ хас да номинациялаах, Арктика уонна Хоту улуустар экэниэмикэлэрин уонна социальнай олох эйгэтин бастыҥ үлэһиттэригэр бэриллэр.
Ыам ыйын 22 күнүгэр Арассыыйа полярниктарын ассоциациятын 10 сылыгар анаммыт “Саха сирин Арктиката” уопсастыбаннай тэрилтэ үөрүүлээх тэрээһинин кэмигэр бириэмийэлэри аан бастакытын туттардылар. Санатан эттэххэ, ыам ыйын 21 күнүгэр 2013 сылтан бэттэх Арассыыйаҕа Полярник күнэ бэлиэтэнэр.
Быйыл Үлэ сылыгар Владимир Членов аатынан национальнай бириэмийэни тыа хаһаайыстыбатын салаатыттан “Хоту уонна Арктика бастыҥ табаһыта” ааты – Усуйаана табаһыта Сергей Филипповка, оттон “Арктика бастыҥ аҕа ууһун общината” ааты – Эбээн Бытантайтан Альберт Колесов салайааччылаах “Кочевник” аҕа ууһугар туттардылар. Үлэлэрэ сыаналаммыт хоту сир хоһуун дьонугар истиҥ эҕэрдэ буолуохтун!
Маны таһынан, Хоту сиргэ уонна Арктикаҕа үлэлиир автомобильнай тырааныспар, өрүс пароходствотын, гражданскай авиация үлэһиттэрэ, социальнай өттүнэн эппиэтинэстээх сир баайын туһанааччы, бастыҥ иистэнньэҥ маастар уонна бастыҥ уопсастыбанньык диэн номинацияларга бастыҥнар талыллыбыттар.
Варвара Обулахова хаартыскаҕа түһэриитэ
Бэйэ кэр.
