Ыам ыйын 22-28 күннэригэр ыытыллыбыт Биир ньыгыл Арассыыйа баартыйа барыллаан куоластааһыныгар Саха сирэ биир үрдүк көрдөрүүлээх регион ахсааныгар киирбитин эспиэрдэр иһитиннэрдилэр. Ол курдук, куоластааһын ыытыллар pg.er.ru саайтыгар 110 тыһ. киһи киирэн бэлиэтэммит. Ол эбэтэр, куоластааччы 56% кыттыбыт.
Санатан эттэххэ, күһүн Ил Дарханы таһынан, Ил Түмэҥҥэ, Дьокуускай куорат дууматыгар уонна уон оройуон дьокутааттарын сэбиэтигэр дьокуттааттары талыы буолаары турар. Онон сибээстээн, быйылгы праймеризка 545 хандьыдааттан сайаапка киирбит. Бу 2018 сыллааҕар үс төгүл элбэх. Маны сэргэ, эдэр уонна баартыйата суох хандьыдаат элбэҕэ бэлиэтэммит.
Политтехнолог Марат Баширов: «Куоластааһыҥҥа көхтөөх кыттыы дьон былааска эрэлэ улаханын туоһулуур, ол эбэтэр былаас уопсастыбаны кытта үчүгэйдик үлэлиир эбит» диэн быһаарар. Онтон сиэттэрэн, кини күһүҥҥү быыбарга өссө үрдүк көрдөрүүнү сабаҕалыыр. Оттон политтехнолог Алёна Август: «Саха сирин олохтоохторо уруккуттан даҕаны көхтөөхтүк кытталлар, манна судаарыстыбаттан туспа олоруу биһирэммэт. Дьон быйылгы быыбарга интэриэһин күһүн өрөспүүбүлүкэ аҕа баһылыгын талыы буолара күүһүрдэр. Дьиҥэр, манна улахан интириигэ суох. Айсен Николаев рейтинэ балай эмэ улахан», - диэн санаалаах. Эспиэр өссө баартыйа састаабын уларытыы дьон баҕа санаатын кытта дьүөрэлэспит буолуон сөп диэн этэр.
Праймеризка кыттыы көхтөөхтүк барарыгар дьайыан сөптөөх өссө биир түгэнинэн анал байыаннай дьайыы кыттыыллаахтара киирбиттэрэ буолуон сөп диэн санаа эмиэ иһилиннэ. Олор ортолоругар Арассыыйа Дьоруойа Александр Колесов баар.
Куоластааһын Москуба бириэмэтинэн бөлүүн 03.00 чааска pg.er.ru сайтка түмүктэммитэ. Бигэргэммит түмүк сарсын, ыам ыйын 30 күнүгэр тахсар. Оттон ким төһө куолаһы ылбытын билигин киирэн көрүөххүтүн сөп.
Сонун төрдө: http://club-rf.ru
