Дьокуускайдааҕы тыа хаһаайыстыбатын техникума “Профессионалитет” федеральнай бырагыраама чэрчитинэн Хаҥаластааҕы “Хачыкаат” ТХПК-ны партнер оҥостон, бииргэ үлэлэһэр. Санатан эттэххэ, “Хачыкаат” кэпэрэтиип ааспыт 2022 сыл түмүгүнэн, өрөспүүбүлүкэ бурдук үүннэрэр хаһаайыстыбаларын ортотугар бастыҥ үлэлээҕинэн быһаарыллыбыта.
Бу саас хаһаайыстыба 1650 гаа ыһыы сирдээҕиттэн туорахтаах култуураны 1580 гааҕа ыспыта. Уоннааҕыта – сүөһү-сылгы сиир култууратыгар анаммыта. Сааскы, күһүҥҥү ыһыы үлэтигэр бэлэмнээх буолар гына сөптөөх тэрилинэн балай да хааччыммыт. Быйыл ыһыыга туттуллар комплексы, сири таҥастыыр агрегаты атыыласпыт. Кэпэрэтиип бэрэссэдээтэлэ Роман Куприянов сотору өсө 520 ат кыамталаах , түөрэригэр 5 суол дьайыыны оҥорор кыахтаах тыраахтар кэлиэхтээҕин иһитиннэрдэ. Бу тыраахтары лизинг төрүтүгэр чэпчэтиилээх усулуобуйаҕа ылбыттар. Биэс сыл төлөһүөхтээхтэр. Манна көрсүбүт ночоотторун сабыныыга субсидия көрүллүө.
Үөһэ этиллибитин курдук, тыа хаһаайыстыбатын техникума “Хачыкааты” кытта үлэлэспитэ уонтан тахса сыл буолла. Ол быһыытынан, быйылгы ыһыыга “Тыа хаһаайыстыбатын тиэхиньикэтин уонна оборудованиетын туһаныы уонна өрөмүөннээһин” идэҕэ үөрэнэр устудьуоннар быраактыкаларын бараллар. Теорияны таһынан дьиҥ хаһаайыстыба үлэтигэр сылдьаллара кинилэр үлэҕэ, сатабылга үөрүйэхтэнэллэригэр көмөлөһөр. Дириэктэр этэринэн, сайыҥҥы кэмҥэ үлэлиир кэлэктиип аҥаара устудьуон аймах буолар. Онон икки өрүккэ маннык бииргэ үлэлэһии тэҥинэн табыгастаах.
