Ыам ыйын 31 күнүгэр Горнай улууһун Атамай нэһилиэгин Кыайыы болуоссатыгар уопсайа 70 маһы (7 саастаах акациялары) олортулар.
Акция нэһилиэк "Ситим" уопсастыбаннай тэрилтэтин, олохтоох дьаһалта көҕүлээһининэн, Бэрэсидьиэн пуондатын үбүлээһининэн тэрилиннэ. Мастары олордуу аахсыйата ботаническай сад (ИБПК СО РАН) научнай салайыытынан ыытыллар. Научнай салайааччы Анна Егоровна Сысолятина.
Аахсыйаҕа нэһилиэк көхтөөх олохтоохторо, бастыҥ уопсастыбанньыктара, үөрэнээччилэрэ кыттыыны ыллылар. Нэһилиэкпит ис-тас көрүҥүн тупсарар үтүө аахсыйаҕа кыттыспыт үтүө санаалаах дьоммутугар, оҕолорбутугар махталбытын биллэрэбит. Мас олордуутугар үтүө холобуру көрдөрбүт, тус кылааттарын киллэрбит аҕа саастаах дьоммутунан киэн туттабыт. Акация олороругар уунан, буорунан, кумаҕынан хааччыйбыт бастыҥ уопсастыбанньык урбаанньыппытыгар Д.А. Филипповка улахан махтал.
Мантан салгыы бу олордуллубут мастар куура хаппаттарын, чэчирии үүнэллэрин туһугар сайыҥҥы лааҕыр тэриллэр. Нэһилиэк дьонун-сэргэтин, кыһамньылаахтык сыһыаннаһан, ынах-сүөһү киирбитин көрдөххүтүнэ тутатына биллэрэргитигэр көрдөһөбүт.Мастарбыт чэчирии үүннэллэрин туһугар бука бары кыһаллыаххайыҥ диэн ыҥырабыт.
Мантан күһүн "Кэскил" түөлбэҕэ, "Саҥа олох" бырайыак чэрчитинэн 170 мас 5 араас көрүҥэ олордуллуоҕа.
«Ситим» уопсатыбаннай тэрилтэ салайааччыта Т.А. Павлова.
