Өрөспүүбүлүкэтээҕи көрбөттөр бибилэтиэкэлэригэр биллиилээх бэйиэт, публицист, сахалартан бастакы тифлопедагог, Брайль систиэмэтинэн сахалыы алпаабыты айааччы, хараҕынан көрбөт Иван Николаевич Егоров – ИванГорнай аатын иҥэрдилэр.
СӨ култуура уонна духуобунай сайдыы миниистирэ Юрий Куприянов бибилэтиэкэ үйэ аҥаара кэмнээх баай устуоруйалааҕын уонна Арассыыйа анал бибилэтиэкэлэриттэн биир бастыҥнара буоларын бэлиэтээтэ.
- Саха сирин көрбөттөрүн бибилэтиэкэтэ көрбөттөр уопсастыбаларын чаҕылхай бэрэстэбиитэлэ, чулуу киһи Иван Горнай аатын кытта быстыбат ситимнээх. Ил Дархан Айсен Николаев кини аатын бибилэтиэкэҕэ иҥэрэргэ дьаһал таһаарбыта олус сөптөөх, - диэн миниистир санаатын эттэ.
Бу сонуну Москуба, Санкт-Петербург, Новосибирскай, Уфа, Казань, Грознай, Владивосток куораттарга көрбөттөрү кытта үлэлиир улахан эспиэрдэр үөрэ иһиттилэр. Олор истэригэр Арассыыйатааҕы судаарыстыбаннай көрбөттөр бибилэтиэкэлэрин дириэктэрэ, к.п.н. Елена Захарова (Москуба), биллиилээх тифлоэспиэр, тифлотехнологияларга 150 ыстатыйа ааптара, бу эйгэҕэ сүрүн исписэлиис Никита Цейковец (Санкт-Петербург), А.И. Герцен аатынан Арассыыйатааҕы судаарыстыбаннай педагогическай университет, Хоту сир норуоттарын институтун профессора Александр Петров уонна да атыттар бааллар.
Сонун төрдө: CӨ култуура уонна духуобунай сайдыы министиэристибэтин, Өрөспүүбүлүкэтээҕи көрбөттөр бибилэтиэкэлэрин пресс-киинэ
