Бэс ыйын 1 күнүттэн Саха сиригэр Владимир Путин ыйааҕынан тэриллибит «Аҕа дойдуну көмүскээччилэр» судаарыстыбаннай пуонда регионнааҕы филиала үлэлээн саҕалаабыта. Пуонда сүрүн соругунан анал байыаннай дьайыылартан уурайан кэлбит бэтэрээн кыттыылаахтары уонна сүтүктээх дьиэ кэргэттэри көрүү-истии, кинилэргэ көмөлөһүү буолар.
Салайааччы Алексей Александров иһитиннэрбитинэн, филиал координатордара бастакы нэдиэлэ иһигэр 70 киһиэхэ көмөлөспүттэр. Манна үлэлиир координатордар Арассыыйатааҕы норуот хаһаайыстыбатын уонна судаарыстыбаннай сулууспа академиятын Уһук Илиҥҥи салайыы институтугар анал үөрэҕи ааспыттар.
«Анал байыаннай дьайыы кыттыылаахтара уонна кинилэр дьиэ кэргэттэрэ кэллэхтэринэ барыларын истэбит. Дьон кыһалҕата араас буолар: байыаннай дьайыы бэтэрээнин статуһун ылыы, докумуоннары оҥотторуу, үлэҕэ киирии, реабилитацияны ааһыы, ОДьКХ өҥөтүгэр чэпчэтиини туһаныы, санаторнай-курортнай сынньалаҥҥа барыы уонна да элбэх. Ону сэргэ, координатордар федеральнай уонна региональнай төлөбүрдэри быһаараллар, сокуон-быраап өттүнэн сүбэ-ама биэрэллэр», - диэн салайааччы бэлиэтээтэ.
«Аҕа дойдуну көмүскээччилэр» судаарыстыбаннай пуонда регионнааҕы филиала Дьокуускай куоракка Ойуунускай уул. 41/1 №-дээх дьиэтигэр үлэлиир.
Хаартыска ааптара: Мария Васильева
Бэйэ кэр.
