Дьокуускай куорат баһылыга Евгений Григорьев Туймаада ыһыаҕын анал байыаннай дьайыы кыттыылаахтарыгар аныырга быһаарда. Арассыыйа дьоруойа, «Боотур-1» этэрээт хамандыыра Александр Колесов баһылык быһаарыытын толору өйөөтө.
«Саха дьоно Үрдүкү Айыылар көмөлөрүгэр күүскэ итэҕэйэр. Онон Туймаада ыһыаҕар Саха сирин олохтоохторо анал байыаннай дьайыыга сылдьар байыастарбытыгар аналлаах Алгыска түмсүөхтэрэ уонна уолаттарбыт кыайан-хотон, тыыннаах эргиллэн кэлэллэрин туһугар көрдөһүөхтэрэ», - диэн Александр Колесов эрэллээхтик эттэ.
Кини этиитигэр Луганскай норуодунай өрөспүүбүлүкэ «Хорсунун иһин» мэтээлин ылбыт Эрсан Андреев кыттыста: “Киин куорат баһылыга саха үгэһин уонна итэҕэлин ытыктыыра олус үчүгэй. Анал байыаннай дьайыы кыттыылаахтарын өйөөн ыһыаҕы кинилэргэ аныырга быһаарбыта олус сөптөөх”, - диэн санаатын эттэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата.
