2020 сыллаахха Төрүт тыл уонна сурук-бичик күнүгэр Саха Өрөспүүбүлүкэтин Ил Дархана Айсен Николаев 1007 №-дээх ыйааҕынан от ыйын 1 күнэ Национальнай бэчээт күнүнэн биллэриллэн олохтоммута.
Саха Өрөспүүбүлүкэтин быйылгы Национальнай бэчээтин күнүн көрсө, саха тылынан суруйар суруналыыстар ортолоругар «Уһун Дьурантаайы» диэн үтүө үгэс буолбут аһаҕас күрэх ситиһиилээхтик ыытыллан түмүктэннэ.
Күрэҕи Саха Өрөспүүбүлүкэтин инновацияҕа, сыыппара сайдыытыгар уонна инфокоммуникационнай технологияларга министиэристибэтэ, Арассыыйа суруналыыстарын сойууһун Саха сиринээҕи салаата уонна Арассыыйа национальнай СМИлэрин ассоциацията тэрийэн ыыттылар.
«Уһун Дьурантаайы-2023» дьүүллүүр сүбэтигэр үлэлээтилэр: түсчүт – Афанасий Гуринов-Арчылан, «Күрүлгэн» сурунаал эрэдээктэрэ; Владислав Доллонов, «Полярная звезда» сурунаал сүрүн эрэдээктэрэ; дьүүлдьүттэр – Евдокия Иринцеева, С.А. Новгородов аатынан «Айар» национальнай кыһа киэҥ араҥаҕа анаммыт таһаарыыларга эрэдээксийэтин эрэдээктэрэ; Данил Макеев, «Чолбон» сурунаал солбуйааччы эрэдээктэрэ; Ольга Степанова, «Саха» судаарыстыбаннай тэлэбиидэнньэ-араадьыйа хампаанньатын шеф эрэдээктэрэ; дьүүл үлэтин кэтээччи – Розалия Олеговна Павлова, СӨ ИССуоИТ министиэристибэтин сонуну киэҥник тарҕатар ситимҥэ уонна бэчээт эйгэтигэр судаарыстыбаннай бэлиитикэ салаатын салайааччытын солбуйааччы; дьаһабыл – Галина Алексеевна Бочкарёва, Арассыыйа суруналыыстарын сойууһун Саха сиринээҕи салаатын бэрэссэдээтэлин солбуйааччы.
Күрэххэ киин куораттан уонна улуустартан 34 суруналыыс кытынна, 63 сайаапка, 167 үлэ киирдэ. Быйыл «Бастыҥ эҕэһит» тосхолго биир да үлэ киирбэтэ. Онон суруналыыстар сэттэ тосхолго күрэхтэстилэр.
Дьүүллүүр сүбэ бастыҥ үлэлэри талан маннык түмүгү таһаарда
«Бастыҥ ирдьит»: I миэстэ – Евдокия Неустроева, «Томпо илдьитэ» хаһыат бастакы категориялаах эрэдээктэрэ; II миэстэ – Мария Дегтярёва-Күндэли, «Кыым.ру» саайт уонна социальнай ситим эрэдээктэрэ.
«Бастыҥ анаарааччы»: I миэстэ – Сайаана Львова, «Саха сирэ» хаһыат бэлиитикэни анаарааччыта; II миэстэ – Анивера Акимова, «Саха сирэ» хаһыат сүрүн эрэдээктэрин солбуйааччы.
«Бастыҥ суоллааҕы бэлиэтээһин»: I миэстэ – Айтана Аммосова, «Саха сирэ» хаһыат эрэдээктэрин солбуйааччы; II миэстэ – Ксения Новикова, «Дабаан» хаһыат тастан кэрэспэдьиэнэ, Кэбээйи улууһа; III миэстэ – Елена Потоцкая, «Саха сирэ» хаһыат кэрэспэдьиэнэ.
«Бастыҥ дьүһүйээччи»: I миэстэ – Ангелина Васильева, «Саха сирэ» хаһыат «Саха ыала» сыһыарыытын эрэдээктэрэ; II миэстэ – Николай Крылов, бэтэрээн суруналыыс, «Саха сирэ» хаһыат тастан кэрэспэдьиэнэ; III миэстэ – Владислав Коротов, үгүс хаһыат-сурунаал, саайт тастан кэрэспэдьиэнэ.
«Бастыҥ ырытааччы»: I миэстэ – Айыына Ксенофонтова, «Киин куорат» хаһыат кэрэспэдьиэнэ; II миэстэ – Марианна Тыртыкова, «Ил Түмэн» хаһыат анаарааччыта; III миэстэ – Светлана Винокурова, «Томпо илдьитэ» хаһыат тастан кэрэспэдьиэнэ.
«Бастыҥ кэпсэтээччи»: I миэстэ – Алёна Докторова, Мэҥэ Хаҥалас «Эркээйи» хаһыатын сүрүн эрэдээктэрэ; II миэстэ – Касьян Олесов, Нам улууһун «Эҥсиэли» хаһыатын кэрэспэдьиэнэ; III миэстэ – Илья Оконешников, «Байдам» сурунаал.
«Бастыҥ кэпсээччи»: I миэстэ – Саргылаана Багынанова, «Кыым» хаһыат кэрэспэдьиэнэ; II миэстэ – Вячеслав Алексеев, Горнай улууһун «Үлэ күүһэ» хаһыатын I категориялаах эрэдээктэрэ; III миэстэ – Семён Аргунов, Нам улууһун «Эҥсиэли» хаһыатын I категориялаах эрэдээктэрэ.
«Анал байыаннай дьайыыны сырдатыы иһин» анал биһирэбил ‒ Сайаана Львова, «Саха сирэ» хаһыат бэлиитикэни анаарааччыта.
«Уһун Дьурантаайы-2023» күрэх кыайыылаахтарын итиитик-истиҥник эҕэрдэлиибит!
Кыайыылаахтары бэлиэтээһин, туоһулары туттарыы бэс ыйын 30 күнүгэр Саха бэчээтин ыһыаҕар үөрүүлээх быһыыга-майгыга ыытыллыаҕа.
БЫҺААРЫЫ:
Уһун Дьурантаайы ‒ олоҥхоҕо кэпсэнэр Айыы халлааныгар олорор суруксут. Аҕыс кырыылаах аалыы дьэҥкир таас баҕанатыгар Үрдүк Айыылар ыйаахтарынан аан дойду олоҕун тутулун уонна Орто дойду дьонун дьылҕаларын суруйар.
