Дьокуускайдааҕы көтөр фабриката мэлдьи кэҥиир, сайдар суолу тутуһар. Бу сылга фабрика 91 мөл. сымыыты оҥорон, саҥа таһымҥа тахсыахтаах. Онтон 2024 с. бэлиэр 100 мөл. сымыыкка сыал-сорук туруоруналлар.
От ыйын 5 күнүгэр, сэрэдэҕэ, Ил Дархан Айсен Николаев фабрика кэлэктиибин кытта көрүстэ, үлэ-хамнас туһунан билистэ.
“Бүгүҥҥү күҥҥэ көтөр фабрикатын иннигэр туруорар сыалбыт-сорукпут – 2024 с. 100 мөл. сымыыты оҥорон таһаарыы, оччоҕо Дьокуускай куораты уонна өрөспүүбүлүкэ киин улуустарын хааччыйыа этибит. Туруоруммут сыалбытын ситиһэрбитигэр ситимнээх үлэ тирэх буолуо. Олохтоох оҥорон таһаарыы хаһан баҕар үчүгэй хаачыстыба кэрэһитэ буоллаҕа” – диэтэ Айсен Николаев.
Сыах үлэһиттэрэ этэллэринэн, оҥорон таһаарыы тэтимин саҥа оборудование кэлбитэ биллэ түргэтэппит. Даҕатан эттэххэ, 2018 с. Дьокуускайдааҕы көтөр фабриката 53 мөл. сымыыты оҥорон таһаарара.
Бу туһунан СИА суруйар.
