Арассыыйа Дьоруойдара Алексей Неустроев уонна Филипп Евсеев бүгүн Дьокуускайга көтөн кэллилэр. Кинилэри чугас дьонноро уонна Ил Дархан Айсен Николаев көрүстүлэр.
«Дойдубутугар этэҥҥэ кэллибит. Олус өр кэминэн да буоллар, эргиллэр күннээх эбиппит. Уоппускаҕа сылдьабын», – диэн Алексей үөрүүтүн үллэһиннэ.
«Чугас дьоммун, оҕолорбун көрөн дьоллоннум. Аны дойдубар дьиэ кэргэммин кытта сылдьыахпын баҕарабын. Кыргыһыы кэмигэр барыта олус бытааннык барар курдуга, оттон видеоҕа – олус түргэнник буолбут эбит. Хамандыырым «Газ!» диэн хамаандатынан үлэлээтэҕим дии» — диэн Филипп кэпсээтэ.
«Уолбуттан олус долгуйар, ахтар этим уонна киэн туттабын. Кини олус холку, аҕыйах саҥалаах. Хорсун быһыытын туһунан интэриниэттэн билбиппит. Уолбун көрөн арыый уоскуйдум», – диэн Алексей ийэтэ Зарема Алексеевна Неустроева үөрүүтүн үллэһиннэ.
Саха сириттэн анал байыаннай дьайыыга бастакы Арассыыйа Дьоруойа Александр Колесов уолаттар Арассыыйаҕа эрэ буолбакка, бүтүн аан дойдуга биллибиттэрин, дьиҥнээх дьоруой буолалларын бэлиэтээтэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА