Саха сирин Киин быыбардыыр хамыыһыйатын иһитиннэриитинэн, УИК боротокуолларын 96, 18%-нын ааҕыы түмүгүнэн Саха сирин Ил Дарханын дуоһунаһыгар «Биир ньыгыл Арассыыйа» баартыйа туруорбут хандьыдаата Айсен Николаев кыайда. Киниэхэ быыбардааччы 76,14%-на (222315 киһи) куоластаата.
Федеральнай политолог Николай Асафов бэйэтин блогар Айсен Николаев кыайыытын туһунан: «Николаев Саха сирин 2018 сыл ыам ыйыттан салайар. Ол кэмтэн дьоһуннаах үлэ ыытылынна. Өрөспүүбүлүкэ Арассыыйа тэтимнээхтик сайда турар регионнарыттан биирдэстэрэ буолла. Манна барар үчүгэй уларыйыылар дойду бэрэсидьиэнин, үрдүкү салалтатын болҕомтотун күүскэ тартылар уонна утары турар электорат аҕыйыырыгар тиэртилэр. Ол курдук, быыбарга Саха сирин хас сэттис олохтооҕо кытынна. Бу атын регионнарга тэҥнээтэххэ, үрдүк көрдөрүү», - диэн сыанабыл биэрдэ.
Оттон Ил Түмэҥҥэ баартыйалары талыыга «Биир ньыгыл Арассыыйа» инники күөҥҥэ таҕыста (54,41%). Бу 2018 сыллааҕы быыбарга тэҥнээтэххэ, 10%-нан үрдүк. Иккис миэстэни 14,09% көрдөрүүлээх «Саҥа дьон» баартыйа ылла. Манна Госдуума дьокутаата Сардаана Авксентьева улахан өҥөлөөх диэн этиэххэ сөп. Салгыы КПРФ 13,11%, «Сиэрдээх Арассыыйа — Кырдьык иһин» (9,53%), ЛДПР (5,33%) уонна «Родина» (0,99 %) кэлэллэр.
«Ыраас быыбар иһин» куорпус хамсааһын салайааччыта, «Тутулуга суох уопсастыбаннай мониторинг» ассоциация (НОМ) толорооччу дириэктэрэ Алена Булгакова быыбарга 2 тыһ. тахса уопсастыбаннай кэтээн көрөөччүлэр үлэлээбиттэр. Кинилэр региоҥҥа улахан кэһиилэри булбатылар.
