Балаҕан ыйын 17 күнүгэр Хаҥалас улууһун Булгунньахтаах сэлиэнньэтигэр ыытыллар «Хортуоска фест» бэстибээл чэрчитинэн 50 тахса киһи кыттыылаах "Саха сирин рекордун кинигэтин" бастакы рекорда олохтонуо.
Булгунньахтаах олохтоохторун уонна ыалдьыттарын бэстибээлгэ минньигэс итии аһылык, тыа хаһаайыстыбатын бородууксуйатын быыстапка-атыыта, маастар-кылаастар, дьиэ кэргэн "Үс көлүөнэ" күрэһэ, «Кындыкан» этно-кэнсиэр, олохтоох хортуоскаттан 100 араас бүлүүдэ уонна «Народный выбор» бастыҥ бүлүүдэни талыы кэтэһэр.
Оттон бэстибээл сүрүн тэрээһинин - «Аһаҕас уокка ыһаарыламмыт хортуосканы күргүөмүнэн буһарыы» рекордун олохтооһуну Саха сирин рекордун кинигэтин бэрэстэбиитэлэ бэлиэтиэҕэ.
Хаҥалас улууһун 1-кы Малдьаҕар нэһилиэгин баһылыга Айталина Васильева этэринэн, бэстибээли уонна рекорд олохтооһунун Булгунньахтаах хортуоскатын киэҥ эйгэҕэ тарҕатар соруктаах тэрийэллэр.
«Саха сирин рекордун» кинигэтин регистраторынан «Ситим-Медиа» ХЭТ буолуоҕа.
Буолар сирэ уонна кэмэ: Култуура уонна сынньалаҥ паарката, күнүс 11:00 чаастан киэһэ 18:00 чааска диэри
Сонун төрдө: https://yakutia24.ru
