Бэҕэһээ Дьокуускай куорат Автодорожнай уулуссатын 40/9 №-дээх дьиэтин таһыгар бетон билиитэ оҕолор үрдүлэригэр сууллан, улахан алдьархай таҕыста. Тоҕус саастаах кыысчаан олоҕо билиитэ анныгар быһынна, үс оҕо араас эчэйиини ылла.
Кэлин биллибитинэн, бу урут сабыллыбыт «Лира» маҕаһыын кирилиэһиттэн ордон турбут атахтаах билиитэ эбит. Оҕо былаһааккатыттан чугас буолан, манна оҕо аймах сөбүлээн тоҕуоруспут. Билиитэ атаҕа хамсаабыта ырааппыт сурахтаах. Ол тухары биир даҕаны улахан киһи көрөн үҥсүбэтэх, дьиэни хааччыйар хампаанньа туох да миэрэни ылбатах.
Иэдээннээх быһылаан тахсыбытын кэннэ Дьокуускай куорат уокуруктааҕы дьаһалтатыгар мунньахтаан сэрэтэр миэрэлэри күүһүрдэргэ быһаардылар. Баһылык эбээһинэһин толорооччу Георгий Гаврильев бары уокуруктарга, дьиэлэргэ киһи олоҕор кутталы үөскэтэр конструкциялары бэрэбиэлкэлииргэ сорудахтаата. Маны сэргэ, киин куорат дьаһалтата өлбүт оҕо төрөппүттэригэр үбүнэн-харчынан көмөнү мэктиэлээтэ уонна буруйдааҕы булар тэрээһиннэргэ кыттыах буолан эрэннэрдэ.
Официальнайа суох иһитиннэриинэн, суорума суолламмы кыысчаан төрөөбүт күнэ эбит... Эрэдээксийэ аатыттан чугас дьонугар дириҥ кутурҕаммытын тириэрдэбит.
Бэйэ кэр.
