Олохтоохтор туруорсууларынан, Дьокуускай куорат уокуруктааҕы дьаһалтатын Урбаан, ырыынак уонна туризм сайдыытын департамена Дьокуускай куорат Уопсастыбаннай палаататын кытта элбэх кыбартыыралаах дьиэлэргэ уонна ол аттынааҕы сирдэргэ арыгы атыылыыр тэрилтэлэр өрөспүүбүлүкэтээҕи сокуоҥҥа төһө сөп түбэһэллэрин бэрэбиэркэлээн көрдүлэр.
Санатар буоллахха, арыгы атыыланар кэмин, усулуобуйатын уонна миэстэтин хааччахтыыр сокуону Саха сирин парламена 2023 сыл олунньутугар ылыммыта. Дьокуускайга арыгыны атыылыыр саала болуоссатын алын кээмэйин 75 кв. миэтэрэҕэ диэри улаатыннарбыттара. Маны сэргэ, арыгы атыылыыр сир үөрэх тэрилтэтиттэн, балыыһаттан, успуорт эбийиэгиттэн, олорор дьиэлэртэн төһө ыраах туруохтааҕын чопчулаабыттара.
Мониторины ыытар бөлөх «Пивчик», «Точка», «Пивовар» бар-маҕаһыыннарга, «У Бати» уонна «Визит» маҕаһыыннарга сырытта. Ол түмүгэр, 203-с түөлбэҕэ «Пивчик» бар-маҕаһыыны уонна 202-с түөлбэҕэ «У Бати» маҕаһыыны саптылар. Онтон атыттарга иһитиннэрии кумааҕытын туттардылар уонна быһаарыы биэрдилэр.
Департамент салайааччытын э.т. Кирилл Лазарев Дьокуускайга сымыйа кафеҕа майгынныыр 56 уопсастыбаннай аһыыр сир баарын бэлиэтээтэ. Бу тэрилтэлэргэ барыларыгар арыгы атыыта хааччахтаныахтаах.
Сонун төрдө: Дьокуускай куорат уокуруктааҕы дьаһалтатын пресс-сулууспата
